United in final an lut

Pathianni zing khan FA Cup semi-final hnuhnung zawk khelh a ni a. Wembley Stadium-a inkhel hmuhnawm leh inhnehtawk takah Manchester United chuan penalty shoot-oit ah hnehna an chang a. Manchester City hmachhawn turin final an lut.
Semi-final hnuhnung zawkah FA Cup-a champion ngun ber dawttu Manchester United in an khel tha tawk lova, hun pangngaiah chak phu zawk chu an khingpui Brighton & Hove Albion an ni. Final luh ngei tumin team hnihte hian tan an khawh a, goal thun theihna hun remchang nei ve ve mah se minute 120 chhungin goal thun thei an awm lova.
Extratime zawh thlenga goal thun thei an awm loh vangin penalty shoot-out hmangin final lut tur zawk zawn chhunzawm a ni a. Manchester United chuan 7-6 a hnehna changin final an lut.
Tie-break-ah hian United leh Brighton tana pettu hmasa paruk ten tha takin an pet goal vek a. Brighton tana pet hnuhnung ber Solly March chuan goal chungah a pet over luah a, United in chak theihna hun remchang an nei. Pet goal a chak theihna hun tha tak an neih laiin United tan defender Victor Lindelof a penchhuak a. Lindelof hian goal kilah tha zeta pet goal in chakna goal a thun a, United chuan FA Cup final an lut ta a ni.
Kum ruk chhung zet champion lova an awm hnuin United hian Erik ten Hag hnuaiah trophy an chawi leh ta a, League Cup-ah an champion. EPL leh Europa League-ah champion beiseina an neih loh hnuin FA Cup final an lut a, trophy dang lak belh leh theihna hun tha a nei zui leh. Final-ah an elpui lian Manchester City hneha an champion a nih chuan Trophy pahnih nen season an khar dawn a, an tan season kharna tha tak a ni ngei ang. Hetihlai hian final-a an khingpui tur Manchester City hi inelna lian pathumah champion kawp thei dinhmunah an ding mek a, United kawng daltu nih an tum ngei ang.
FA Cup final hi June ni 3, Inrinni zanah khelh a ni dawn a. Wembley-ah Manchester khaw club lian pahnih Manchester City leh Manchester United ten inkhel hmuhnawm an lantir ngei tura ngaih a ni. City hi champion tura rinkai zawk an ni ang.