United leh Spurs an tlang

March 13, Ningani zan khan Europa League last 16 khelh zawh a ni a, English club lian pahnih; Manchester United leh Tottenham Hotspurs tan hnehna changin quater-final an lut.
Bruno Fernandes a vul
Last 16 thawh khatnaa hnehna chang zo lo Manchester United chuan Old Trafford-ah La Liga club Real Sociedad an mikhual. United hian an mualah bul tan chhe viau mah se captain Bruno Fernandes hattrick siam hmangin hnehna a chang a. Bruno Fernandes vul zarah United an vul.
Chak mamawh chunga Old Trafford a leng lut a, bul pawh an tan tha hle. Real Sociedad hian inkhel tan atanga minute 10-na lekah penalty an hmu. He penalty hi Mikel Oyarzabal chuan a pet goal a, hmahruaina goal a thun. Hma takah goal an thun vangin Spanish club hi phur viau mah se an phur rei lo, minute 16-na lekah penalty an chawi ve thung. He penalty hi captain Bruno Fernandes chuan awlsam takin a pet goal a, an si phurh a sut. Hma takah goal hnih lut nghal mai mah se goal a luh belh lawk thei lova, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm leh zual a, penalty, goal pangngai leh red card hmuh tur a awm. Second half-ah United in bul an tan tha ve thung a, minute 50-na lekah Garnacho siamsak tha tak atangin goal hmahruai thuntu Bruno Fernandes chuan hma an hruai nawn lehna goal a thun. Goal an chhuah hnu lawkah Real Sociedad an vanduai zui leh nghal zat a, an player Jon Aramburu chu minute 63-naah hnawhchhuah a ni. Old Trafford ah si phur zawk leh tlem Sociedad tan thawhchhuah a har tawh a, hun tawp tlengin an bet zui ta chiah reng bawk.
An mualah tam zawk ni chunga inlan United hi an phur leh zual a, goal hnih an thun belh zui ta bawk. United hian minute 87-naah a vawi hnihna atan penalty a n hmu. Goal hnih thun tawh Bruno Fernandes chuan he panalty hi hattrick siam nan a hmang a, United goal thumna a thun. Fernandes hian sawisel hlawh thin mah se goal leh assist hmangin captain rintlak a nihzia a lantir nawn leh thin a, huaisen takin hma lam a pan reng thin.
Fernandes-an hattrick a siam hnu hian hun pek belh minute 90+1-ah Diogo Dalot chuan United goal lina a thunzui leh a, an chakna a nem nghe, Dalot goal thun hnu hian an goal dang a luh belh tawh lova, Manchester United hian si belhkhawmah 5-2 a hnehna changin Quarter-final an lut. Quarter-final ah Lyon an hmachhawn zui leh ang.
Tottenham pawh an chak
Last 16 thawhkhatnaah si khat faia tlawm tawh Tottenham Hotspurs chuan an mulah AZ Alkmaar an mikhual a, 3-1 a hnehna changin an khingpuite an leh thal a, quarter-final an lut.
An mualah chak ngei mamawh Tottenham hian an mikhualte lehthal ngei tumin tan an khawh a, minute 26-naah Wilson Odobert chuan goal a thun a, first leg-a an si phurh a sut. Spurs hian goal thun belh tumin an mikhualte nawr nasa viau mah se chawlhlawk hmain goal an thun belh thei tawh lo.
Chawlhlawk hnu lamah Tottenham an khel tha chhunzawm a, goal an thun leh thuai. Second-half tan atanga minute thumna lekah James Maddison chuan an goal hnihna a thun. Tottenham in goal hnih an thun hnu hian mikhual team AZ Alkmaar tan Peer Koopmeiners chuan goal thunin an si phurh a sut then. Tihian ei belhkhawmah 2-2 a ni ta chiah a, inelna boruak a nung thar leh hle.
Goal an chhuah hnuin Tottenham in tan an khawh thar leh nasa hle. Na taka an mikhualte an nawr an hlawkpui a, minute 74-naah Wilson Odobert chuan goal pawimawh zet a thun. Odobert goal thun hnu hian goal dang a luh belh thei tawh lova, Tottenham chuan si belhkhawmah 3-2 in hnehna an chang a, quarter-final an lut ta a ni.