United States-ah Indian PM Modi lawm

US President Joe Biden chuan US-India inlaichinna chu fakin US tlawha zin mek Prime Minister Narendra Modi chu ropui taka lawmna an nei.
PM Modi lawm nan hian marching band te, vegetarian dinner turu tak te bakah White House South Lawn ah laipui tum 21 kah a ni.
PM Modi hian US Congress-ah thusawina nei bawkin standing ovation pekin a awm hial bawk a. Tun hmaa US-in human rights bawhchhe nasa tia visa a pek duh loh PM Modi chu tunah chuan thawhpui pawimawh berah a nei tawh a ni.
Washington chuan India chu Indo-Pacific a China lian zual zel tur dan nana pawimawh angah a ngai a, mahse, hei tak hi Delhi chuan a ngaina em em lo thung.
Congress a thusawina a neihah Modi chuan hming hmerh chuan China a sawi lang hauh lo nachungin ‘intihluihna leh inbakaihna nasa takin Indo-Pacific a tuam mek a ni’ tiin a sawi thung.
Modi chuan hming hmerha Russia emaw tu nge indo bultan tih sawi lo bawkin ‘Ukraine buaina avangin Europe-ah indona a let leh ta’ tiin a sawi thung.
India chuan tun thlengin Russia sawiselna a la chhakchhuak duh lo va, a chhan bera ngaih chu Russian defence import-a thuk taka a innghah avang leh Moscow nena tun hma atanga inthianthatna an lo neih tawh vang a ni bera ngaih a ni.
Hei hian Washington leh Delhi inkar pawh a tichak lo hle a, mahse Biden chuan a tha lam hawia thil thlir zawk thlangin ram pahnih inlaichinna chuan a chak lai ber a tawng mek a ti thung a. Ram pahih inlaichinna chu ‘kum zabi 21 a inlaichinna tha ber pakhat’ tiin a sawi.
Modi pawhin US Congress hnenah khawvela democracy ram ropui pahnih inzawmna tiin a sawi a. Ram pahnih inlaichinna chu ‘khawvel pum tihchak nana hmanraw pawimawh’ a ni thei tiin a sawi bawk a. Ram pahnih inlaichinna chuan ‘bung thar’ a kai tiin a sawi bawk.
Mahse mi tin ten PM Modi chu an lawm chuang lo. Indian Prime Minister chu lungawilote hmehmih tuma puh a ni a. A Hindu nationalist sorkar chu minority te laka hleilenna leh humhimna lama thawk tawk lo tia puh a ni a. US a tlawhah pawh lungawilohna lantirna a awm chungin a tam zawk te erawh chuan an lawm thung a, chung zingah chuan Silicon Valley CEO thahnem tak an tel a ni.
US Congress-a PM Modi thusawi boycott chu liberal Democrats an awm nual a, chung zinga langsar tak chu Alexandria Ocasio-Cortez niin PM Modi human-rights record avang ngawt pawhin ropui taka lawm chi a ni lo a ti.
Ram pahnihte chuan World Trade Organization a ngaihdan inang lo paruk an neih teah inremna an siama hei bakah hian general electric leh Micron ah thawhhona thuthlung an ziak bawk a.
PM Modi chuan kum 2014 atanga Prime Minister a nih hnu atanga a tih nai miah tawh loh ti bawkin reporter te hnen atangin zawhna lain a chhang bawk a ni.
India rama human rights chungchang an zawhnaah PM Modi chuan ‘Kan thisen zamah democracy a awm tlat’ tia sawiin, India ramah inentleuna a awm lo,” tiin a sawi bawk.