UP INTHLAN: Politic game a intan, tangho tur la chiang lo

UP INTHLAN: Politic game a intan, tangho tur la chiang lo
February, 2027-a assembly inthlang tur, Uttar Pradesh-ah politic khelhna lian a intan mek a, political party hrang hrangte chu an inbuatsaih tan.
BJP chuan thutkhawm pawimawh hrang hrang an nei tawh a. Inthlan tur thlirin tun hnaiah Uttar Pradesh cabinet pawh tihlen a ni a, minister thar paruk lak luh an ni a, mi dang pahnih hnenah independent charge pek a ni bawk.
BJP hian Rashtriya Lok Dal, Apna Dal, Nishad Party, leh Suheldev Bharatiya Samaj Party te nen tangrualin inthlan hi chuh an tum a. He thawhhona hmang hian BJP hian Uttar Pradesh-ah hian chi (caste) inrualkhai taka kalpui a tum.
A do let nan Samajwadi Party hruaitu, Akhilesh Yadav chuan ‘PDA’ formula a hmang mek a – hei hi Pichhda (backward class), Dalit leh Alpsankhyak (minority) te thawhhona sawina a ni.
Eptu tangrual, INDIA thawh ho dan tur erawh hriat thei a la ni lo va. Congress leh Samajwadi Party inkara inbiakna tan a la ni lo va, pahnih hruaitute hi an thil sawi danah erawh inepna an nei a. Hetih lai hian Congress hruaitu pahnih chuan Bahujan Samaj Party (BSP) hruaitu, Mayawati chu a inah an lenchilh tawh bawk.
Congress chet lakna hian Uttar Pradesh-ah hian politic boruak thar a luhtir ngei dawn niin a lang a. Samajwadi Party chuan assembly bial 403 chu anmahnia chuh vek turin an inbuatsaih tih an puang zui ta reng a. Hemi hnu rei vak lovah state Congress hotu, Ajay Rai-a pawhin hetiang bawk thuchhuah hi a siam a, bial zawng zawng mahnia chuh turin an inbuatsaih mek tih a sawi.
West Bengal assembly inthlanah khan INDIA-a telte hi inkarah inbeihna a awm a. Congress MP Rahul Gandhi-a’n Trinamool Congress (TMC) hruaitu, Mamata Banerjee-i beih nan nasa takin hma a la a, Akhilesh Yadav-a’n Banerjee-i tan Kolkata-ah a tlawh ve thung.
Lok Sabha inthlan khan Samajwadi Party hian Uttar Pradesh-a bial khat chu TMC dinna atan an lo pe tawh a. Hetih lai hian Delhi leh Lucknow-a politic hruaitute chuan Congress leh Samajwadi Party thawhhona hi pumpelh theih loh a nih thu an sawi a; mahse, dinna bial insem tura inremna leh inbiakna chu thil hautak a nih ngei a rinawm.
Congress leh Samajwadi Party hi kum 2024 Lok Sabha inthlanpuiah hian an lo tang dun tawh a, Samajwadi Party hian bial 62-ah an chuh a. Bial 37 an la a, Congress-in bial 17 an chuhah paruk an la thung a. Hemi atanga thlir hian Congress chuan assembly bial 70 tal chuh an beisei laiin Samajwadi Party erawh chuan 50 aia tam an ken theih a rinawm loh.
Lok Sabha inthlan result hi assembly bial-a chantir chuan Samajwadi Party hian assembly bial 184 an chang tihna a ni a, Congress erawh 39 chauh a ni a. Party pahnihte thawhhona siam turah hei hi an thlirna pakhat ni tura ngaih a ni.
Akhilesh Yadav-a chuan Muslim-te vote a darh lohna tura hma lak a pawimawh tih a hria a. Tun tumah hian AIMIM hotu, Asaduddin Owaisi-a chuan bial 50 velah chuh a tum a, a bik takin Moradabad, Saharanpur, Azamgarh, Meerut, Muzaffarnagar, Bijnor leh Mau-ah te candidate neih a tum a. Hei vang tak hian Samajwadi Party hian heng hmuna Muslim vote a darh lohna turin Congress puihna a mamawh dawn a ni.
Congress hian an zinga Mayawati-i tel ve turin hma a la mek a, chuti a nih loh chuan Muslim candidate tam tak dahin Samajwadi Party a tichhe thei dawn a. Politic thiamte chuan BSP-in a mala an chuh leh Owaisi-a leh Chandrashekhar Azad-a kaihhruai, Azad Samaj Party thawhhona a awm chuan BJP-in an hlawkpui thei dawn niin an ngai a ni.