Upa pension pechhuak thei hnai
Sawrkar laipui hotute chuan upa pension pekchhuahna tura tihfel hmasak ngai awm chu an chingfel hnai tawh a, a rang thei ang bera sum rawn pek an tum thu anmahni dawrtu minister Lalrinpuii an lo hrilh.
Health & Family Welfare leh Social Welfare, Women & Child Development minister Lalrinpuii hian Delhi-ah sawrkar laipui houte a dawr a. Upate pension chungchangah a enkawltu ber, Ministry of Rural Development-a senior economic advisor Kalyani Mishra kawmin upa pension-a harsatna awm thin an sawi dun a. SNA Sparsh avanga centre-in upa pension an release theih loh reng chu an chinfel tep tawh tih economics adviser hian a lo hrilh a, SNA Sparsh a fel chuan a rang thei ang bera release zel an tum thu a lo hrilh.
Union minister for Women & Child Development Annpurna Devi a hmuhnaah Mizoram atanga nu leh naupang chawikanna project an thehluh ho a sawipui a. Hmun hrang hranga Anganwadi Centre building chhe lutuk sak thatna tur proposal leh hmeichhe hamthatna tura project a thehluh chu sawrkar kum kal mek tawp hmaa sanction sak turin a ngen.
Union minister of state for Ayush Prataprao Jadav hnenah Mizoram hmu hrang hranga 10 bedded hospital siam belhna tur ruahmanna a sawipui a. Pratap Rao hian Hortoki-a 10 bedded hospital siam tur chu supplementary action plan-a telh a, pawmpui dan kawng zawn sak a tum bakah 10 bedded hospital dang pathum pawh sawrkar kumthar lamah hmalak dan kawng zawn a tum thu a lo hrilh. Ayush hnuaia Mizoram-in 10 bedded hospital a neih meka thawktute hlawh centre-in a tumsak thin pawh kum thar lam atan tum sak zui a remtih sak bawk.
Asian Development Bank country director Mio Oka leh Health minsiter hi an inkawm a. Tunhnaia ADB-in Mizoram sawrkar flagship programme – Universal Health Care Scheme kalpuina atana externally aided loan pek a remtih chungchangah thawh dunna tha neih zel dan kawng an sawi a. Tih tur hmachhawp hrang hrang sawiin, Mizoram-in tunhnaia World Bank Project – MHSSP Project hlawhtling taka a kalpui avangin Mizoram sawrkar chu thawhpui zel an chak tih a lo hrilh a; ADB loan project pawh hlawhtling taka kalpui a nih ngei a beisei tih a sawi a ni.