Upate enkawlna hmun tilian dawn

Upate enkawlna hmun tilian dawn
Enkawltu hranpa nei lo kum upate enkawlna hmun – Upate Run chu tihlen a ni dawn tih Social Welfare minister Lalrinpuii chuan a sawi.
Ainawn Veng Aizawla kum upate enkawlna – Upate Run (State Senior Citizens’ Home) chu Nilaini khan Social Welfare minister hian a tlawh a. Sawrkarin Upate Run a nei chu lawmawm a tih thu sawiin, tuna mi 10 awm theihna ni mek chu mi 20 awm theihna tura tih len tum a nih bakah rilru lama harsatna nei tana hmun bik, Mental Rehab pawh mi tam lehzual awm theihna tura hma lak nghal a nih tur thu a sawi.
Care giver-te training programme buatsaih a ni a, mi 50 zirtir chhuak an awm tawh a, chu’ng mite chu indaihlohna leh tulna avanga upate enkawl kawnga harsatna neite tan koh theih an ni dawn tih a sawi a ni.
Sawrkar hmalaknain mumal zawka physiotherapy leh mobile medical service kalpui tum a ni tih minister Lalrinpuii hian a sawi a. Kum Upate Ni hmanna atan cheng nuai 5 ruahman a ni a, NSAP hnuaiah kum 60 chunglamten pension an la thei a, mi tam lehzualin an lak theihnan leh mi harsa zawk, hmeithai leh naupang chaklo, tanpui ngaite tan Social Welfare department kaltlanga sawrkarin tanpuina a pek thin pawh mi tam zawkin an hlawkpui theihna tura hmalak mek zel a ni tih a sawi bawk.
Upate Run hi kum 60 chunglam, enkawltu leh chawmtu mumal neiloten, hlim tak leh thlamuang taka a thlawna an belh theih tura duan niin, Social Welfare & Tribal Affairs department hnuaiah 1989 January 1 khan din a ni. Tum khatah mi 10 awm theihna a ni a, din a nih atanga vawiin thlengin mipa 52 leh hmeichhia 26 enkawl an ni tawh. Tunah mi 7 awm mekin, awm dil, endik mek mi 5 an awm. A hmunhma thawmthat mek a ni a, chawlh hahdamna tur ‘Inte’ sak thar a nih bakah hawi thawvenna tur Recreation Park siam tum a ni. Welfare officer kaihhruaiin thawktu mi 8 an awm a ni.