US-ah school naupangin silai leh hmanraw dang hmangin school bei

US-ah school naupangin silai leh hmanraw dang hmangin school bei
Florida naupang, Carlo Dorelli, kum 11 mi chuan silai leh hman raw dang hmangin school a bei a, man nghal a ni.
He pawikhawihtu hi Creekside Middle School a zirlai nia sawi a ni a, a thiltih chhan hi hriat a la ni rih lo. Thuneitute chuan silai leh chemte hmanga school a beih ngei thu hi sawiin, naupang mai a la nih avangin a bik taka enkawlna hnuaiah thuzawhfiah mek a nih thu an sawi.
Kar hnih liamta mai pawh khan Georgia a Apalachee High School zirlai, kum 14 mi chuan zirlai pahnih leh zirtirtu pahnih a lo kaphlum tawh bawk.
US ah hian naupang zawkte pawikhawihna a hluar chho leh tan hle nia sawiin, police department lam pawh an inralring lawk leh nasa tan hle niin thuchhuahah chuan tarlan a ni.
Police lamin an chhuina kal zelah pawikhawhtu Carlo-a inah hian silai leh chemte mai bakah mi tihnat theihna hmanrua hmuhchhuah nual a ni a, Volusia County Sheriff Michael Chitwood chuan he thil thleng chungchangah hian thuchhuah neiin, ‘Tu nu leh pa mahin an fate hetiang ti tur hian an zirtir ngai ka ring lo. Mahse, vawiinah chuan kan ramah a thleng chho mek ta si. Naupangte hi kawng dik kawhhmuh an ngai tak zet a, kan tanrual chuan sualna hi kan hneh tlang thei ang. I bei ang u,’ a ti.