US-ah Taylor Swift a la lar ber

Taylor Swift hi kar khat chhunga US-a zaithiam lar ber niin Billboard Artist 100 chart-ah a No.1 a, he chart-a a No.1 tawh zawng zawng belhkhawm chu kar 76 a tling ta a, Artist 100 chart-a No.1 ni ngun ber a nihna a sawhnghet leh ta sauh e.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga an album leh hla hralhna bakah, streaming leh radio airplay te chu tehna pawimawh a ni.
Taylor Swift hian a album leh hla hralh that zar a la zo ta zel a, a album thar ‘Speak Now (Taylor’s Version)’ chu Billboard 200 (albums) chart-ah No.4 a la ni a, ‘Midnights’ chu No.5 niin, ‘Lover’ chu No.6 leh ‘Folklore’ chu No.9 te niin, Albums 200 chart top 10-ah a album pali a la lang thei a, hei bakah hian a album dang ‘1989’ (No.13), ‘Reputation’ (No.15), ‘Red Taylor’s Version)’ (No.18), ‘Evermore’ (No.24), ‘Fearless (Taylor’s Version)’ (No.30), ‘Taylor Swift’ (No.144) leh ‘Speak Now’ (No.181) te chu chart-ah an la lang bawk.
Billboard Hot 100 chart-ah a hla ‘Cruel Summer’ chu No.3 niin, ‘Karma’ featuring Ice Spice chu No.13 a ni a, ‘Anti-Hero’ pawh No.18 a la ni a, ‘Blank Space’ chu No.49 niin, ‘I Can See You (Taylor’s Version) (From the Vault)’ chu No.63 a ni bawk.
Travis Scott chu No.1 atangin No.2-ah a tawlh a, Morgan Wallen chu No.4 atangin No.3-ah a insawn leh hret a, Luke Combs chu No.5 atangin No.4-ah a insawn a, Post Mallone chu No.3 atangin No.5-ah a tawlh ve thung.