US chawimawina sang semchhuak

US chawimawina sang semchhuak
US President kalchhuak tur Joe Biden chuan US civilian chawimawina sang ber Presidential Medal of Freedom chu Secretary of State hlui Hillary Clinton, philanthropist George Soros, Vague editor-in-chief Anna Wintour, scientist Bill Nye leh actor Denzel Washington te leh midang 14 te hnenah a hlan.
Hun neih remchan loh avangin Argentinian football star Lionel Messi chuan chawimawina dawng tur hian White House a pan thei lo bawk a.
“President ka nihna anga a hnuhnung ber turin kan ram chawimawina sang ber Medal of Freedom hi mi danglam leh ropui tak tak te culture leh America tana nasa taka sulhnu neite hnenah ka hlana ni” tiin Biden chuan a sawi.
Medal hlanna hi White House a East Room ah neih niin president hlui BIll Clinton te, cabinet member leh Defense Secretary Loyd Austin te bakah celebrity thahnem tak an tel bawk.
“Heng mite hmathlir leh sulhnu hi khawvel khawpui lian ber ber te, hmun kilkhawr ber ber te thlengin hriat a ni a, mihring kan nihna anga inhnaih zawkna te mai bakah kan theihna piah lamah ram kan nihna anga kan tihtheih te min kawhhmuh a ni” tiin Biden chuan a sawi.
“Cultural icons, humanitarians, rock star, sports star in nihna angin riltam te eitur in pe a, natuar te inchhawm dawl a, kan chetvelna leh hriatreng tur te min pe a ni. in theihna leh thiamna te hmangin mi tam tak hlimna leh damna in htlen a, mi tam tak nunah thu in sawi a, midang te pawh hmahruaia chetla ve turin in sawm a. beih kan tawh lai pawhin America values te humhimin hma in la a ni” tiin Biden chuan a sawi.
Fannie Lou Hamer, America a racial justice thlak danglam tu, Ashton Carter, Secretary of Defense 25 na leh Robert Francis Kenndey Attorney General a nih laia racial segregation nasa taka beitu leh George W ROmney sumdawng nia American Motors Corporation chairman leh president lo ni tawh bawk chu an thih hnuah chawimawina hlan an ni bawk a, an aiawhin an chhung ten an laksak a ni.
Medal of Freedom pek zinga standing ovation pek chhun chu Hillary Clinton a ni a. “lawyer a nih laiin rights of children a buaipui a. First Lady a nih laiin universal health care leh woman’s right chu human rights a puan theih nan hma a la a. Senator a nih laiin September 11, 2001 hnuah New York rebuild leh nan hma a la bawk a. Secretary of State a nih laiin khawvelah democracy a chungnun theih nan hma a la bawk a” tiin a chungchang sawinaah tarlan a ni.
Medal dawngtu langsar tak George Soros chu Hungary ah Jewish chungkua atanga piang niin Nazi te tlanchiatsanin a zalenna atan leh midang zalenna atan khawvel hmun tinah hma a la zui a. England ah lehkha zirin chumi hnuah America ah pemin investor turu tak niin philanthropist langsar tak society tha awm theih nan hma a la zui a ni.
“Immigrant nia zalenna hmu leh America a hnianghnara awm ka nihna angin ka chawimawina dawn hian min khawih hle a ni” tiin Soros chuan a sawi.
Soros hnena medal hlan hi MAGA supporter leh Republican leadership te chuan nasa takin an sawisel thung a. “Tualthattu te hremna a tihniamsak hnuah leh a fapa a ngaihdam hnua George Soros hnena Presidential medal of Freedom hlan hi America beihna a ni” tiin GOP leader Nikki Haley chuan a swi a.
“George Soros khan kan khawpui liana criminal te zalen tak an awm theihna tur ruahmantu politicians te thlantlin an nih theih nan dollar maktaduai tel a seng a ni” tiin Montana Senator Tim Sheehy chuan a sawi bawk.
Soros aiawha medal dawngtu a fapa Alex thung chuan a pa chu American patriot a dam chhung zalenna leh human rights humhim a nih theih nana beitu a ni a ti a. “Ka pa hnathawh te hriatsak nia kan ram chawimawina sang ber hlan a ni hi ka lawm a ni” a ti ve thung.