US classified document putru internet-a darh chuai chuai chuan harsatna nasa tak siam zui zelin. Henga thlalak leh file pawimawhte chu February thla atang tawh kha messaging app Discord-ah tarlanin a awm tawh a.
Timeline mumal taka tarlang vekin leh military acronym thahnem tak nen heng document te hi ‘top secret’ tia inchhinchhiah thlap niin Ukraine indona kaihhnawih file pawimawh chungchuang te bakah China leh an thurualpui te information te pawh a tel a ni.
Pentagon officials te chuan he document putru te hi a tak ngei a ni tih an sawi a. Media tam tak ten heng document te hi enfiaha zirchian an nih hnuah sawhkhawk nasa tak nei thei a ni tih tarlan a ni.
-- Advertisement --
Western special force te Ukraine ram chhungah inbun
23 March-a document pakhat chuan Western special forces te chu Ukraine ram chhungah tam lo tak inthupin an awm tih a tarlang a, mahse, an awmna chiah a sawi lang lo thung. UK chuan mi leh sa ngah berin 50 a dah a, Latvia-in 17, France-in 15, US-in 14 leh the Netherlands-in 1 a dah bawk.
Hetiang thil pawimawhah hian Western government-in sawi a nei duh ngai lo va, mahse, he document putru hi chuan Moscow a tih thinrim rin niin a hma zawng pawhin Moscow chuan Ukraine chauh ni lovin Nato ram pum a do tel tiin a lo sawi fo tawh a ni.
Document dangah chuan Ukrainian brigade thar te inpeih hun turte hma an lak tan theih hun turte kimchang takin an tank leh armoured vehicles leh artillery neih zatte nen lam tarlan a ni bawk a.
Map pakhatah phei chuan eastern Ukraine-a Ukraine dinhmun dik tak tarlan a ni a. Ukraine-in air defence lama hnufumna a neih te nen lam sawi niin February thla khan Kyiv chuan critical missile a tlachham tan dawn a ti daih tawh bawk a.
Casualty figure pawh tarlan niin Russian sipai 223,000 in nunna an chan emaw hliam emaw a ti a, Ukrainian sipai 131,000 vel te nunna chan emaw hliam an awmin a dah bawk a.
Egypt-in a rukin Russia hnenah rocket pek a tum
Washington Post-in document a hmuhpuiah February thla laihawl atang khan Egypt chuan Russia hnenah a rukin rocket 40,000 vel pek a tum tiin tarlan a ni bawk a.
President Abdul Fatah al-Sisi chuan officials te chu rocket siamchhuaka a ruka Russia thawn tura tiin hei hi Khawthlang ram te nena inbakkaihna pumpelh nan a ruka thawn tur a ti nia sawi a ni.
Abdul Fatah al-Sisi chuan chhun leh zan zawma thawka rocket chu siam tura tiin chu chu Egypt in a hmaa Russia-in a puihna a rulhlet theihna ber tiin a sawi a, a hmaa Russia-in Egypt a puihna chu eng nge tih erawh sawi lan a ni lo. Mahse, January thla atang khan Russia chuan Egyptian wheat a chawkluh a tipung vak a, chu chu ni theia ngaih a ni.
Chutih laiin Egypt chu US security assitance dawngtu lian ber zingah telin kum khatah US atangin tanpuina $1 billion hu vel lai a dawng thin thung. Hetihlai hian Egyptian official te chuan document in a tarlan te chu dawt muhlum leh behchhan awm lo tia sawiin Cairo chuan awn bik a nei lo a ti zui nghal.
South Korea-in Ukraine-a ralthuam pek ngaihtuah
He classified document hian South Korea chuan Ukraine hnena ralthuam pek leh pek loh turah a buai hle a ti a. Thutlukna siam mai thei lovin national security advisor te an inhmu zing dup a ti bawk a.
US-in Ukraine-ah ralthuam thawn lut turin a tur a, chutih laiin indo ramte hnena ralthuam pek chu an ram kaldan a ni ngai bawk si lo a ni. Hei vang hian adviser pakhat chuan US thu zawm lo hreh bawk si, mahse, langsar taka Ukraine hnena ralthuam pek ai chuan Poland hnenah peka chuta tanga Ukraine a pekluh dan ngaihtuah a ni tia sawi a ni bawk.
Seoul chuan Ukraine hnena ralthuam pek tlang pawp chu a hreh hle a, a chhan ber pawh Russia tihlungawi loh kher a duh loh vang a ni a. Chutih rualin, US thu zawm lo a hreh bawk si a ni.
February thla khan China-in hypersonic weapons a enchhin
Document putru chuan February thla khan Beijing chuan experimental missile – DF-27 hypersonic glide vehicle chu 25 February khan a enchhin tiin a tarlang bawk.
He missile hi minute 12 thlawkin 2,1000 km lai a thleng hman tiin document chuan a tarlang bawk a. Missile hian US ballistic missile defence system chu a tawn tlang thei ngei tura ngaih, tih a ni bawk.
Document putru hi US thuneitute chuan chhuizui mek zelin a titute chu hrem loha an chhuah loh tur thu an sawi lawk sa nghal thlap tawh bawk.