US-in a hren Russian lawnga thawk Indian pathum chhuah

US sipaiten Atlantic Ocean hmar lama Russian tuialhthei phur lawng lian a hren meka thawk Indian pathumte chu chhuah an ni tih thuneituten an sawi.
US-in khawi ram tuipui mah ni lova hma a laknaa lawng hrena Indian tang chhungte mangang taka an awmna chu a tawp ta tih Thawhtanni khan an puang a ni.
Marinera hi kar hmasa khan American thuneitute chuan ram hrek mek – Venezuela, Russia leh Iran hminga ‘a ruka’ che chhuaka tuialhthei phur nia sawiin an hreng a ni.
Khawi ram tuipui mah ni lo laia hren niin a thawktu chuang zawng zawngte pawh thu zawh fiah turin an hreng tel vek bawk.
Tanker-ah hian thawktu mi 28 an awm a, an zinga pathum hi Indian an ni a. A dangte hi Ukraine, Georgia leh Russia-a mite an ni hlawm niin News18 chuan a tar lang.
A tirah US thuneitute chuan thawktute hian hremna an tuar thei tih an sawi a, hei hi Moscow chuan na takin a dik loh thu a sawi nghe nghe.
News18-in a tar lan dan chuan Indian pathum zinga pakhat hi kum 26 mi, merchant navy officer niin Kangra district, Himachal Pradesh-a mi a ni a. Tun hi he tanker-a a zin chhiah vawi khatna a ni a. A chhungte chuan hren an nih tukah khan an la inbia a, chu chu a hnuhnung ber niin an sawi.
Indian-te chhuah an nih thu puan a nih hma, kar hmasa khan Russia chuan US thuneituten Russian bikte chu an chhuah dawn tih a lo sawi tawh bawk.
Moscow chuan lawng hren a ni hi a sawisel nasa a, thawktu hren an ni pawh dan ang taka hma laksak an nih tur thu a sawi a. US chet dan chu ‘pawmzam chi ni lo’ a nih thu a sawi bawk.
US-in lawng lian hrenga Indian an tel ve mek lai hian Sergio Gor chu India-a US ambassador ni turin New Delhi-ah a awm tan chiah a. A pisa a luah tana thuthar lakhawmtute a kawmnaah New Delhi leh Washington an indawr zui nghal mek thu a sawi.
“Lehlam lehlam hi an inbe tawn reng a, sumdawnna thil sawiho pawh naktukah (Thawhlehni) hian neih chhunzawm a ni ang,” tiin Thawhtanni khan Gor-a hian a sawi a ni.
Russia chuan tuialhthei phur lawng hren a ni hi dan l leh Washington-in khawvela inhuatna boruak a siamna hmanrua niin a sawi a. Thawktu hrem tumna awm phei chu ‘pawm chi loh hulhual’ niin a sawi a, khawvel huapa lawnga insumdawn tawnna tiderthawng thei a nih thu a sawi.