US-in a hren Russian lawnga thawk zingah Indian pathum tel

Russian tuialhthei phur lawng lian, Nilainia US sipaiten an hrenah thawktu mi 28 an awm a, an zinga pathum hi Indian an nih thu Russia Today chanchinbuin a tar lang
Marinera hi US sipaiten Caribbean Sea atanga a hnu an chhui hnuah Atlantic hmar lamah an nangching niin Russia-a transport ministry-in a sawi tih an tar lang a. US thuneitute chuan Venezuela nen dan lova inzawmna an neih vanga hreng ta rih an ni tih an sawi.
RT chuan lawng hi mi mal sumdawngin a hman niin Bella 1 tiin a hming vuah a ni a. Guyana ram hminga che chhuak a ni a, thawktu mi 28 an awm a, heng zinga paruk hi Georgia mi an ni a, Ukrainian 17, Indian pathum leh Russian pahnih niin an tar lang.
Tuialhthei phur man hi US tuipui huam chin, hrek mek lawngte luh phal lohnaa a luh hnua man a ni a, US Coast Guard-ten luh an tum pawh an lo dang nia sawi a ni a. US thuneitu sang pahnih chuan Coast Guard leh US sipaiten beihpui thlakin an hreng ta niin an sawi tih Reuters-in a tar lang.
Reuters chuan tuna thil thleng hi US sipaiten Russian lawng lian an hren hmasak ber niin hriat a nih thu a tar lang a. A hma lawkin US Special Force-ten zanah Caracas luhchilhin Venezuelan President Nicolas Maduro an man bawk.
Russian rorel khawm zinga mi, United Russia party mi, Andrei Klishas-a chuan US chet dan chu lawng suam hmangte chet dan ang chiah a nih thu a sawi niin TASS state news agency-in a tar lang.
Russian transport ministry chuan lawnga US sipaite an luh hnuah Marinera hi an bepawp thei tawh lo niin an sawi.
RT chuan Marinera chung vela helicopter thlawk kual lai thlalak a tichhuak a, US sipaiten lawnga luh an tum lai vel ni ngeiin a lang a ni.