US-in inbiak beisei, Iran an la chiang lo thung

US chuan Pakistan-ah Iran nena remna zawnga inbiakna kalpui theih a nih a rin thu a sawi laiin Iranian thuneitu sang pakhat chuan Tehran-in tel ve tur a ni em tih a ngaihtuah mek thu a sawi a. Hetih lai hian inkahhai an kalpui mek chuan tawp a hnaih mek avangin harsatna lian leh rinhlelhna a la awm reng bawk.
US President Donald Trump-a chuan tuialhthei man sang zel leh stock market-a chhiatna thleng tur venna tura inremna siam a duh a, Iran-in nuclear ralthuam siamna tur kawng a zawh theih lohthu a sawi bawk a. Tehran chuan indona awm leh thei ven nan Strait of Hormuz a thununna hman tangkai bakah hrekna tihziaawmna tur a dap ve thung a, a nuclear program tibuai thei lo tur inremna siam a beisei bawk.
Iranian thuneitu pakhat chuan Reuters-in a kawmnaah Tehran chuan inbiaknaah a telna chu ‘thil tha’ tia a thlir thu a sawi a, thutlukna erawh siam a la nih loh thu a sawi.
Inbiakna tura palai, Pakistan chuan Nilaini atanga inbiak tan theihna turin thil a kal tih sawiin Trump-a pawh inremna ziah a nih chuan amah emaw, ral atangin emaw a tel thei dawn niin a sawi.
Thu dawnna chuan Thawhlehni khan a hming tar lan a duh thuneitu sang chuan, “Thil a kal zel a, naktuk atan inbiakna pawh a kal zel a ni,” a ti.
Tun kar chhunga US-Iran inbe tur anga sawi a awm hnuah Thawhlehni tuk khan Asia-ah tuialhthei man a tlahniam a, stock pawh a zia leh a, a hma khan Islamabad-a an inbiakah rah tha a chhuah loh avangin sumdawnna a nghawng leh hman hle a. Inbiakna a awm dawn tih a chian loh avangin Thawhtanni kha chuan tuialhthei man hi 6% velin a sang leh hman a ni.
Inbe turte inkarah neuh neuh a awm reng a. Iranian foreign ministry chuan kartawpa US-in Iranian sumdawnna lawng, Touska a beih a dem thu Thawhlehni khan a sawi a, lawng, a thawktute leh an chhungte chhuah nghal an phut.
Iranian sorkar chanchinbu chuan, “Iran chuan a theihna zawng zawng chu a ram thatna leh himna humhimna atan a hmang ang a, a mipuite dikna leh zahawmna humhalh nan a hmang ang… he biala thil thleng nasa zawk a awm chuan US chuan mawha phur ang,” an ti.
US Central Command chuan Touska-a thawktute hian lawng chawlhna an khar an zawm lo va, an vau hnuah pawh a bawhchhe zel niin an sawi.
Iranian Foreign Minister Abbas Araqchi chuan Thawhtanni khan Washington-in inkahhai inremna a bawhchhia chu palaia inbiakna daltu lian tak a nih thu a lo sawi tawh a, an palai lawk, Mohammad Baqer Qalibaf-a pawhin Trump-a’n X-a Iranian lawng chawlhhmunte khar hmanga a nawr chu buaina tipungtuah a puh bawk.
February 28-a atanga US-Israel-ten Iran an beih avang leh Israel-in Lebanon a beihnaah mi sang tam tak an thi tawh a, indona hian khawvel energy inpeknaah harsatna a thlen a, rei tak buaina a chhuah chuan khawvel eibar a tichawl thei dawn nia ngaihna a awm.
US chuan Iranian lawng chawlhhmunte a khar a, Iran-in khawvela tuialhthei leh liquefied natural gas phurh hmun ngaa thena hmun khat vel kalna, Strait of Hormuz a khar chu rei lo te a hawn hnuah a khar leh a. Palai Pakistan chuan Washington-in a khar chu tihtawp a nih theih nan a hma a la mek.
Inbe turte la chiang lo mah se Pakistan chu a thleng turin a inbuatsaih mek a. Islamabad pumah venhim hna thawktu 20,000 vel dah an ni.
US Vice President JD Vance hian Thawhlehni hian Iran nena inbe turin Pakistan a pan niin Axios chuan a tar lang a. Hetih lai hian US-ah a la awm tih sawi a awm bawk.