US-in Israel thlawp bur zui zel

US chuan Israel-in southern Gaza-a Rafah chu thapuiin a runah a ngai lo tiin White House spokesperson John Kirby chuan a sawi.
Hetih lai hian Israel sipaite chuan Rafah khawpui laili lut tawhin Egypt nena inrina bul tlang pawimawh tak an thuhnuaiah an dah tawh tia sawi a ni.
US President Joe Biden chuan tun thla tirlam khan Israel-in Rafah a ‘population centre’ a lut lui a nih chuan ralthuam a pek a hreksak tur thu a lo sawi tawh thung.
Kirby chu Israel-in air strike a neih avanga refugee camp-a Palestinians 45 lai hmeichhia, naupang leh kum upate thihna chungchang zawh a ni bawk a.
Israel chuan a airstrike hmangin Hamas official pahnih a tihhlum thu sawiin civilian te tawrhna thlenna chhan chu a bul hnaia Hamas weapons store a kangmei chhuak vang zawk a nih a rin thu a sawi thung.
Refugee camp kang thlalak chu Kirby chuan rapthlak a tih thu a sawi a. “He buaina avang hian pawisawi lo ten nunna an chan tur ani lo” tiin a sawi zui bawk a. US state department chuan Israel military te chetdan chu uluk taka an thlithlai reng thu an sawi bawk.
Kirby chuan, “Rafah a ground operation neih hi kan thlawp lo hrim hrim” a ti a, “President ngei pawhin a sawi tawh a, thapui thawha ground operation neih a nih chuan kan thlawpna lamah kan ngaihdan a dang daih ang” a ti bawk a.
“Israel sipai ten unit lian tak emaw sipai tam tak emaw nena Rafah an luhchilh kan la hre lo tlat a ni” tiin a sawi.
Israel chuan thla sarih chhung indona kalpui tawhah Rafah luhchhuah a nih loh chuan an thiltum ber Hamas te chhutchiat chu a hlawhtling thei dawn lo a ti thung a.
Israel Defense Forces (IDF) te chuan 6 May khan a hmasa berah Hamas fighters leh an infrastructure te thlurbingin ‘targeted’ ground operation an nei hmasa ber a ni.
Khata tang khan tank leh sipai te chu zawi awiin eastern leh central area lamah an lut thuk tial tial a, chutih rualin hmar lamah Egypt nena ramri 13 km lamah pawh an lut thuk tial tial bawk.
8 May khan CNN ten an kawmnaah President Biden chuan Israeli Prime Minister Benjamin Netanyahu hnenah chiang takin ‘Rafah an lut a nih chuan ralthuam kan pe zui tawh dawn loh thu ka hrilh a ni’ tiin a lo sawi tawh thung a.
Tun thlengin Israel chuan Rafah a population centre te a la lut lo va, a operation neihna chu ramri bul hnaiah chauh a la ni tiin a sawi bawk.
President Biden chu US ram chhungah pawh Gaza indonaah mihring tawrhna tihnep theih dan ang bera hmala tura Israeli sorkar nawr tura tihna a nas ahle bawk.
Democratic Senator Chris Van Hollen, January thlaa Gaza tlawh tu chuan, “Civilian thihna tam lutuk leh mihring tawrhna turu lutuk tawh avangin Biden administration chuan Netanyahu hnenah military assistance pek chawlhsan rih se” tiin a lo sawi tawh a ni.
Pathianni-a Israel in Rafah a air strike a neih khan dem a hlawh hle a. A thenawm ram Egypt mai bakah Qatar te pawhin sawiselin Jordan, Kuwait, Saudi Arabia leh Turkey te pawhin an sawisel na hle bawk.
Egypt chuan Israel chet dan chu Gaza chenna tlak hauh lova siam tumna tiin a sawi a, Watar chuan ‘international law bawhchiatna hlauhawm tak’ tia sawiin inkahhai a awm theih nana ruahmanna tithuanawp thei a ti bawk.
Jordan chuan Israel chu ‘war crime ti’ ah puhin Saudi Arabia chuan Israel chu insuatna a kalpui zel a ni a ti bawk a. Turkish President Recep Tayyip Erdogan chuan ‘heng barbarians leh tualthattute hian hrem an tawk tur a ni’ a ti ve thung.
UN chuan mi maktaduai chuangin Rafah an chhuahsan tawh tiin a sawi a, mi sing tam tak erawh Rafah chhungah an la awm mek a ti bawk.