BJP ten chiang takin chakna chang ang ti

India ram inthlang mekah mit fukna ber chu northern state Uttar Pradesh chu a ni.
Britain tiat vel zeta lian he state-ah hian Britain mipui let li vel an awm a. Mihring maktaduai 257 vel chenna niin India ram state-a mihring tamna ber a ni bawk a. Independent se la chuan khawvelah India dawt chiahah awmin khawvel ram lian pangana ni pha tur a ni.
Lok Sabha inthlan thawh sarihnaah state pathum chauh inthlang tur an awm tawh a, kumin inthlan hian ni 44 lawih awhin June 1 ah inthlanna neih zawh ni dawnin 4 June ah vote chhiar a ni dawn a ni.
UP hian Lok Sabha member 543 awmah 80 lawih a thawh a, Prime Minister Narendra Modi-an sorkar leh ngei a tumnaah UP aia state pawimawh a awm lo.
“Delhi-a rorel tur chuan UP paltlang a ngai a, he state-a che tha apiangin India ramah ro an rel thin tia sawi thin a ni” tiin Shrad Pradhan, senior journalist capital Lucknow a inbun chuan a sawi a.
“India prime minister ni tawh pariat lawih chu UP atanga chhuak an ni” a ti bawk a. Modi pawh western state Gujarat chhuak mah ni se, MP a nih dawn chuan UP a thlang a ni tiin a sawi bawk. Modi hi ancient city Varanasi aiawh niin kuminah pawh tlin leh ngei a inbeisei hle.
Chuvang chuan Modi chuan UP chu thlurbingin roadshow leh rally a nei chamchi a, ni khata tum sarih lawih a neih te pawh a awm a. Bharatiya Janata Party te chuan kumin inthlanah rorel tura mamawh 272 seat a nih laiin seat 370 lak tumin hma an la na hle.
Kum 2014 khan BJP te chuan UP-ah seat 71 an la a, kum 2019 khan seat 62 an la thung a, kumin hian seat 80 awmah 70 chuang lak ngei an tum a ni.
Opposition Congress party hruaitu Gaurav Kapoor chuan party-in UP-ah seat 70 a lak tawh chuan sorkar siam turin seat 202 bak a mamawh tawh lo tiin a sawi.
Tun thla tira Modi an nomination a file dawn pawhin state Chief Minister Yogi Adityanath, Hindu monk atanga politician a inlet chuan kalpuiin mi sang tam takin an lo hmuak a.
BJP te chauhin UP chu alhneh an tum lo, Indian election a prize lian ber a nih angin kum li chuang zet state thununtu lo ni tawh Congress te chuan regional party lian Samajwadi Party te nen tangrualin inthlan an hmachhawn bawk a, party pahnih te chuan seat 79 lak theih an inbeisei thu an sawi.
Tun hnai kum sawm chhung velah chuan UP ah BJP te aia lian an awm lo va, chu chu Modi roadshow a mihring inlan tam em em thin chuan a tarlang chiang hlea ngaih a ni.
Modi kaihhruaina hnuaiah Varanasi chuan nasa taka hmasawnna hmuin highway thar siam a ni a, Kashi-Vishwanath temple tihlen niin river Ganga chhehvel te pawh chei nasat hle a ni.
Politics-ah pawimawhna thuk tak nei mahse UP chu India ram state rethei ber pawl a la ni reng thung a. Sorkar data chuan kum nga kalta nena khaikhin chuan tunah mi maktaduai telin electricity an nei tawh a, toilet pawh an nei tawh a ti. Mahse, UP chu mirethei tamna ber la ni zui zel thungin mi maktaduai tel retheih bakberh atangin khaichhuak mahse maktaduai tel tehmeuh rethei bakberhin an la awm mek tho.
UP chu kum tinin hmeichhiate laka tharumthawhna nasatna ber a la ni reng bawk a, case tam tak te chu politics a thiltithei tak te inhnamhnawihna a ni thin bawk.
Chung thil duhawm lo tak tak te a thleng reng chu party tena remchanga an lak ziah niin opposition apiangin campaign rally an neihnaah pawh auhla bera an hman a ni thin. BJP te chuan UP ah hian kum sarih rorelna an chelh mek tawh a ni.
“A hma zawng chuan he state a inthlanah BJP te chu chak chiangsa anga ngaihna a awm” tiin Abhishek Yadav, Samajwadi Party youth wing leader chuan a sawi a. Mahse, unemployment leh thil man sang zual zel avangin opposition campaign-in hmasawnna a hmu nasa a ti bawk.
BJP-te chuan auhla berah investment tihnasat leh industrial revival a thleng an ti a, mahse, Congress te chuan sorkarin hna tautet a siam thei lo leh industry thar awm lo chu thalai tena BJP an hnawlna tur a ti ve thung.
“Industry thar chu temple a ni mai a. Post-Covid hnua state a sumdawnna hmasawn awm chhun chu hotel leh restaurant te religious tourism kaihhnawih avanga pung chu a ni. |halai ten hna an duh” tiin Gaurav Kapoor, Congress hruaitu chuan a sawi.
Uttar Pradesh chu Lok Sabha seat 80 lawih awmna a nih avangin inthlanah ngaihven ber a ni lo thei lo tlat a, UP a seat la hnem hnem chuan sorkar an siam tlangpui bawk.