US-in ni hnih a zawnin Iran kap leh ta

A zawnin ni hnih nan US chuan Iran a kap leh a, sumdawn lawng an beih chhanna a nih thu a sawi leh bawk.
Inrinnia beihpui thlak thar a nih hi June 17-a US leh Iran inremna thuthlung siamna atana Middle East-a inkahhai hnua thleng niin buaina a la awm reng tih lantirtirtu a ni.
Thuchhuah siamin Middle East-a sipai hmalakna kaihruaitu, US Central Command (CENTCOM) chuan beihpui thlak therte hi ‘Commander in Chief-a kaihhruaina’ hnuaia tih a nih thu a tar lang.
“CENTCOM sipaite chuan Iran-in sumdawng lawng kalte a beih chhunzawm zel avangin vawiin hian beihpui thlak a ni,” tiin command center chuan social media-ah a tar lang.
“US sipai thlawhnaten Iranian sipai enkawlna hmunhma, inbiakpawhna system, air defense hmun, drone dahna hmun leh chil puah phum theihna an kap a ni,” an ti.
Iran chhim lam, Sirik lawng chawlhhmun bula Tahrui khaw chhehvelah puak a awm tih hriat a ni a, hei hi Zirtawpnia US kah lai ber a ni a. Sorkar chanchinbute pawhin Qeshm Island beih a ni bawk tih an tar lang.
An kah tan atanga darkar hnih pawh tling lovah social media-ah US President Donald Trump-a chuan Inrinnia a sipaite chetna hi Iran-in Washington duh ang a zawm loh chuan indona nasa zawk thlen theihna hmahruaitu a nih theih thu a tar lang.
Iran chu inkahhai thuthlung a bawhchhiat fo avangin a sawisel a, lehlam pawh hian bawhchhiaah an puh ve tho bawk.
Trump-a chuan, “An inzir thiam theih loh a hlauhawm hle a ni,” a ti a. “Kan rilru fim thei tawh lo hun a lo thleng thei a, hlawhtling taka kan thawh tan hna chu sipai hmanga kan thawh zawh a ngai dawn a. Chutiang a nih chuan Islamic Republic of Iran hi a awm tawh lo vang!” a ti.
Zirtawpni pawh khan US hian Iran hi a kap tawh a. Inrinni zinga US khawchhak lama zing dar zing dar 4:30 (India-a chawhnu dar 01:30) vel khan Panama flag nei tanker Kiku chu Strait of Hormuz kaltlangin a kal a, thil hriat lohvin a kap nia sawi a ni.
Thawktu hliam an awm lo va, a bungraw chhia leh put pawh a awm lo.
CENTCOM chuan lawng hian tuialhthei thlitfim loh barrel maktaduai hnih chuang a phur a, ‘drone hmanga kah’ niin a sawi.
Zirtawpni pawh khan hetiang avang bawk hian US chuan Iran a beih phah a ni.
Beihpui thlakna thar hi lawng kawng pawimawh, Strait of Hormuz thununna kaihhnawih a ni a. Khawvela tuialhthei phurh 20% vel kalna kawng hi khawvel huap eibara pawimawh a ni.
February 28-a US leh Israel tang dunin Iran an beih hnuah indona a intan a, Tehran chuan a tuipui kam leh Oman nena an inkara strait hi a khar zui ta a. Khawvel puma tuialhthei man a tisang a, Trump-a sorkar chuan an ram chhung leh pawn atangin nawrtu a ngah phah hle.
June 17-a memorandum-ah khan hawn tura tih a ni a, inbiak zui zel tura tih ni mah se inremna hian US, Iran leh an tangrualpui ramte chu ‘Lebanon-ah pawh tiamin, kawng tinrengah sipai hnathawh tihtawp nghal leh nghet taka puan’ a phut a ni.
Ni 60 chhungin inbiak zui a ni ang a, Iran chuan Strait of Hormuz-ah hian man chawi lovin lawng an kal theihna turin hma a la dawn a ni.