US-in Pacific-ah ruihhlo phur nia a sawi lawng pathum kap leh

US chuan Pacific Ocean-ah ruihhlo phurtu nia sawi lawng pathum an kap leh a, mi pariat an thi niin an sawi.
US Southern Command chuan social media-ah an kap lai video tichhuakin lawngte hian ‘ruihhlo tawlhna kawng hriat hlawh tak an zawh a, ruihhlo an phur ngei bawk’ niin an sawi.
Tun hnaiah Pacific leh Caribbean tuipuiah lawng 20 chuang kap chhe tawhin mi 90 vel thi an awm tawh a, hei hi President Donald Trump-a’n heng lai vela ruihhlo phur thin mi sual pawl laka beihpui a thlakna pakhat niin sawi pawh a hlawh hle.
Mi thiam thenkhat chuan US chet dan hi dan kal niin buaina tichhuak thei niin an sawi.
US-in lawng a beih hmasak ber, September 2-ah phei kha chuan sawi a hlawh zual a, an kah hmasakah tumah thi lovin an kah nawn lehnaah an thi ta a ni.
Dan thiam then khat chuan Venezuelan ruihhlo phur lawng US sipaiin an kah hi dan lo an ti a, khawvel huap dana tul lo thlenga mi that anga chhiar theih a ni tih an sawi.
A hmain International Criminal Court (ICC)-a chief prosecutor pawhin US sipaite chet dan chu indo lai ni lova ruahman lawk, fel fai taka inbuatsaih chunga civil mite beihna niin a lo sawi tawh bawk.
White House erawh chuan dan hnuaiah thil tiin ‘kan vaukama tûr rawn daha American-te nun tichhetu’ ruihhlova sumdawngte laka US chhan himna a ni tih an sawi.
US Defence Secretary Pete Hegseth-a chu tuna an kah lehna thar ber chungchang hi Congress-a in hnihah Secretary of State Marco Rubio nen an sawi fiah tura ngaih an ni.
Tun hnaiah Trump-a sorkar chuan Venezuela chu US-a ruihhlo a luh tam chhan bulah puhin President Nicolás Maduro-a nen pawh an inmil loh phah hle.
Maduro-a hian Venezuelan mi sual pawl pahnih, Tren de Aragua leh Cartel de los Soles a nei nia sawiin pawl hnih hi US-in foreign terrorist organisation-a a puan ve ve an ni.
Venezuela kap phak mai turin sipai tam tawk leh khawvela aircradt carrier lian ber, USS Gerald Ford an chhawp bawk.
December 10 khan US sipaite hian Venezuelan tuipui kamah tuialhthei phur lawng an lo hreng tawh a, lawng hi an hrek mek, Venezuela leh Iran atanga ‘dan lova phur luta in foreign terrorist organisation-te puihna’ niin an sawi.
Venezuelan Foreign Minister Yván Gil chuan lawng hren hi dan lo nia sawiin Trump-a chuan Venezuela-a tuialhthei awm tam tak neih a duh niin a puh.
Trump-a’n America-a ruihhlo lut tur dan tuma a beihnaah hian US-a miin overdose avanga an thihpui tam ber, fentanyl chu ‘weapon of mass destruction’-ah a puang a ni.