US-in ralthuam hlauhawm chhawp

US chuan Middle East region boruak tang zelah guided missile submarine a thawn lut.
Defence Secretary Lloyd Austin chuan Middle East pana thang mek aircraft carrier pawhin chak zawkin a tum ram a pan ang, a ti bawk.
US-in hmalakna a kalpuina chhan hi tun hnaiah Hezbollah leh Hamas leaders te tihhluma an awm avanga region puma buaina a chhuah hlauhna lian tak vang a ni.
US chuan Iran-in Israel a bei a nih phawt chuang engti kawngpawhin Israel chhanin a pen chhuak dawn a. Austin chuan US chuan an thawhpui ram chhan turin eng pawh an ti ang tiin a sawi.
Iran chu uluk taka thlithlai mek reng niin Tehran khawpuia July 31-a Hamas top political leader Ismail Haniyeh tihhlum phuba a lak dan tur chu thlir mek a ni.
Iranian-te chuan an ram leilunga Haniyeh thihnaah khan Israel chu demin phuba lak ngei an intiam a. Israel chuan engmah sawi a la nei ve lo thung.
Pentagon chuan thuchhuah a siamah Austin chuan USS Georgia guided missiles submarine chu Middle East region-ah a tirlut mek a ti a.
Hei mai bakah hian USS Abraham Lincolm carrier strike group te F-35C fighter jet te phurtu chu chak zawka zinkawng kalpui turin a ti bawk a. USS Abraham Lincoln hian helai biala lo awm sa a thlak dawn a ni.
Tun thlengin engtiangin nge Iran chuan chet a lak dawn hriattheih a la ni lo va, Israel beihna chu Iranian thlawp militia leh Lebanon-a political movement ni bawk Hezbollah te kaltlang pawhin a ni thei.
Hezbollah-te hrim hrim pawh hian Israel in an senior commander Fuad Shukr chu Haniyeh tihhlum a nih hmalawk darkarah Beirut khawpuiah a tihhlum avangin phuba an lak tur thu an sawi lawk sa tawh bawk.
Professor Mehran Kamrava, Georgetown University, Qatar chuan US-in khawvel hriata submarine a tirhluh thu a sawi hian Iran leh Hezbollah te daltu tura a dah tiin a sawi.
“Mahse Iran hian eng emaw tak tih a tum ngei dawn ni pawhin a hriat theih,” tiin a sawi bawk.
Biden administration chuan Gaza a inkahhaina siama Israeli mitang te chhuah zalen ni bawk se chu chu helai region boruak tang tihdulna tha ber tur a ni tia sawiin inbiakna neih a nih theih nan a ngiat na hle bawk.
Mahse Pathianni zan khan Hamas te chuan US rawtna chu chhangin Israel chuan rawtna awmsa tawh te tihlawhtling mai rawh se a ti thung a.
Hamas-te chuan inkahhai a awm dawn chuan Gaza chung changa an dinna hmasa ang khan kalpui tur niin inbiakna a thara neih a ngai lo an ti ve tlat thung chungin Hamas te chuan inbiakna neihah tel an hreh lo nia ngaih a ni bawk.
Washington chuan a hmain inremna awm theih lohna chhanah Hamas-te chu a lo puh tawh bawk a. Chutihrualin Israeli press-te chuan US chuan inkahhai awm theih lohna chhanah Israeli Prime Minister Benjamin Netanyahu pawh an dem tho tiin an sawi ve thung a. A chhan ber pawh a sorkar tluk loh nan a coalition a far-right member te chu a tilawm lo thei lo tlat an ti bawk.
Kar kalta khan a tum khat nan White House chuan Israel sorkar coalition leader pakhat finance minister Bezalel Smotrich chu a sawi sak a. Smotrich chuan a hmain Israel chuan US-in a rawt inkahhai a awm theih nana inbiakna neih a tih chu a hnawl tur a ni tiin, a hnawl lo a nih chuan Hamas-te laka tlawmna a ni, a ti a ni. Hei hi chhang letin White House national security spokesman John Kirby chuan Smotrich chu a dik lo hul hual tia sawiin dik lo taka chet lak tumah a puh bawk.
Hetih lai hian UK, France leh Germany leader te pawhin inkahhai a awm theih nana inbiakna chu chhunzawm ni se an duh thu an sawi a.
“Inbiakna awm theihna tihkhawtlai a rem lo” tiin UK Prime Minister Sir Keir Starmer, French President Emmanuel Macron leh German Chancellor Olaf Scholz te chuan thuchhuah intawm an siam a. “Buaina chhuah nasat loh nan theih tawp kan chhuah a, boruak tang tihnep a niha ngelnghehna a awm theih nan theihtawp kan chhuah zui zel ang,” tiin an sawi.