US-in ralthuam pea puhna hnawl

US chuan Russia ram beihna, Moscow-in ralthuam keng hel pawl te Ukraine atanga beitute hneha an awmna a tihah inrawlhna a neih loh thu a sawi.
Russia-a Belgorod region chuan Thawhtanni khan beih a tawk a, nikuma Russia-in Ukraine a run hnua Russia ram chhungin beihna a tawh lian ber a la ni.
A hnuah Russia chuan thlalak a tihchhuahah militant tena an kalsan ralthuam thlalak zingah US siam Humvees vehicle te pawh tarlan tel a ni a.
US chuan ‘Russia ram chhung bei turin tumah a fuih emaw tur lo’ tiin a sawi a. State department thupuangtu chuan US pek ralthuam te chu hman a ni tih social media a post chhawn atanga an hriat thu sawiin mahse heng report te hi a dik chiah em tihah rinhlelhna an nei tiin a sawi thung.
News briefing a neihah Mathew Miller chuan, “Ukraine-in he indona a kalpui zel danah engtianga kal tur nge tihah thutlukna a siam tur a ni,” tiin a sawi.
Belgorod kua hi ramri atanga hla lote a awm niin Russia chuan he khua beitu mi 70 vel kahhlumin an awm tiin a sawi a, heng mite hi Ukrainian fighters te vek tiin a sawi bawk.
Mahse Kyiv chuan inhnamhnawihna a nei lo tia sawi thungin Russian paramilitary group pahnih Russian President Vladimir Putin duh lotute thiltih zawk a ni tiin a sawi thung.
Belgorod beih avang hian Moscow chuan counter-terrorism operation puangin thuneitute chuan special power sang tak an nei zui nghal a.
Belgorod governor chuan civilian pakhatin nunna a chan tia sawiin drone hmanga beih an nih thu leh chungte chu kahthlakin an awm tiin a sawi bawk a.
Russia defence ministry chuan ‘Ukrainian nationalist formation’ ten an territory an bei tiin a puang ve thung. Heng Bolgorod beitute vehicle hman pakhatah chuan tun hnaia Russia-in a thunun nia a sawi leh Kyiv in a hnawlsak ‘Bakhmut’ tih chu ziah lan a ni.
Ukrainian officials te chuan Belgorod beitute hi Russia-a inbun Liberty of Russia Legion leh Russian Volunteer Corps (RVC) te an ni a ti ve thung.