US-in sorkar khawlah TikTok hman khap bur

White House chuan federal agencies te chu ni 30 chhunga government device tin atanga TikTok paih vek turin a hriattir a, hei hi Chinese social media app chu inenthlak nana hman nia security atana pawi thei nia ngaih a nih vang a ni.
February 27 khan Office of Management and Budget chuan guidance tichhuakin TikTok chu sorkar data pawimawh lakruk nana hman ni thei tiin a sawi a. Hei vang hian ni 30 chhung ngeiin federal government agency tin te chuan an paihbo vek tur a ni tih a ni.
White House chuan an device atangin TikTok hi an paihsa tawh a. “Biden-Harris Administration chuan national digital infrastructure humhima foreign adversary tena Americans data an pawh theih loh nan theih tawpin hma a la a ni,” tiin Chris DeRusha, federal chief information security officer chuan a sawi a. “He hmalakna hi sorkarin kan digital infrastructure him zawk a siam nan leh American mipui te security leh privacy him zawka siam nana a hmalakna a ni,” tiin a tarlang bawk.
US Congress chuan nikum December thla khan “No TikTok on Government Devices Act” a lo pawm fel tawh a, he dan hmang hian TikTok chu national security, law enforcement leh research kaihhnawih thilah hman a khap a ni.
TikTok thupuangtu Brooke Oberwetter chuan, “Nikum December thlaa federal device tina TikTok dah khapna kha ngaihtuah chiang lova tih a ni a, vanduaithlak takin kha hmalakna kha khawvel sorkar dang te pawhin behchhanah ngaiin he hmlaakna hi political theatre piah lam hret thil a ni,” tiin a sawi.
House Republican te chuan Bill siamin chumi hmang chuan Biden an ram pum huapa TikTok a khap theihna tur kalpui an tum a. He dan hi Re. Mike McCaul chuan pharh tawhin pawm a nih chuan TikTok mai ni lo software application dang national security atana pawithei te pawh khap theihna a ni dawn a ni.
“TikTok download tinte hian an hriattur chu an device a download a nih veleh CCP te chuan an personal information a ruka an lak theihna tur an phum ru a. I phone kha enthlakin a awm reng tihna a ni” tiin Texas Republican Senator chuan a sawi.
TikTok hi ByteDance Ltd. te ta niin US thalai teah chuan la lar vet vet tak mai a ni a. Mahse, tun hnaiah TikTok hmangin Beijing chuan American user data te a la ru nia ngaihna a lian hle a ni.
Mahse TikTok te chuan pha ve thungin Biden administration-in a duh dan angin an security leh data privacy plan te chu tha zawkin an siam an ti ve thung.
Canada pawhin Thawhtanni atang khan sorkar kaihhnawih mobile tinah TikTok hman a khap bawk a. European union executive branch pawhin an hnathawk tena TikTok an hman a khap bawk.