US-in Ukraine hnena F-16 leitir remti

United States chuan Denmark leh the Netherlands atangin Ukraine ah indo thlawhna F-16 chu Russia runna laka a inven theih nan leh pilot te training zawhfel tawh a nih hnuah remtihna a pek thu US official te chuan an sawi.
Ukraine chuan US siam F-16 fighter jet te hi vansang lama Russia chungnunna beihlet nan a lo dil ngat ngat tawh a ni.
Washington chuan Denmark leh the Netherlands te chu pilot te training pek fel an nih tawh avangin F-16 te Ukraine hnena pek remtihna a pe ta a ni.
Denmark leh Netherlands te chuan US chu Ukraine hnena an thlawhna te pek remti turin an lo ngen tawh a. Heng indo thlawhna te hi Denmark leh Netherlands ta ni tawh mahse ram dang an pe dawn a nih chuan a siamtu US remtihna lak hmasak zel ngai a ni.
Ukrainian pilot tam zawk ten F-16 fighter jet khalh an thiam theih nana ram 11 tangrual te chuan tun thla hian Denmark-ah training an buatsaih dawn bawk a. Denmark Defense Minister Troels Poulson chuan kum 2024 kumtir atang chuan training avangin result duhawm tak an neih an beisei thu a sawi bawk a. NATO member ram pahnih Denmark leh Netherlands te hi Russia nena indona kal mek zelah Ukraine pilot te training pek leh F-16 an hman theih nana theihtawp chhuahin sulsutu an ni.
US Secretary of State Antony Blinken chuan Danish leh Dutch hotute hnenah hian an ngenna remtihna lehkha a pe tawh tiin US official te chuan an sawi a.
Blinken chuan, “Ukraine hian Russian huangtauna lakah leh a sovereignty beihna kal zelah mahni invenga a awm theih a ngai,” tiin Blinken chuan a sawi bawk.
Remtihna pek hmangin Ukraine chuan pilot training zawhfel a nih veleh indo thlawhnate chu a hmang thei nghal tawh dawn a ni.
Mahse Kyiv chuan kumin favang leh thlasik lai chuan F-16 te hi a la hmang thei lo tura ngaih a ni thung tiin Ukraine air force spokesperson Yuriy Ihnat chuan a sawi thung a. F-16 hi US company Lockheed Martin te siam a ni.