US-in Ukraine hnenah Patriot air defence system pe dawn

US chuan Ukraine hnenah long-term military aid $6 billion a pe dawn tiin US official te chuan an sawi a. He mi hnuaiah hian Patriot air defense system pawh a tel dawn a ni.
Officials te chuan aid package hi Ukraine Security Assistance Initiative hnuaiah pek a ni ang ti bawkin defense industry te nena long-term contract hmanga kalpui tur a nih avangin thla tam leh kum a kum awh tur a ni thung.
Ukraine funding hi USAI aid pekchhuah tawha tam ber tur niin air defence tana munition – National Advanced Surface to Air Missile System (NASAM) lehe High Mobility Artillery Rocket System (HIMARS) te leh Patriot munitions, Switchblade and Puma drones, counter drone systems leh artillery te pawh a tel vek dawn a ni.
Zirtawpni khan Defense Secretary Lloyd Austin chuan Europe leh khawvel ram hrang hrang defense official te nen Ukraine tanpuina pek chungchang virtual meeting a neihpui bawk a. He inhmuhkhawmna hi Ukraine Defense Contact Group tih niin tun hnai kum hnih chhungin Kyiv tanpuina pekna kawngah hman pawimawh tak a ni.
Tunkar tir lam khan White House chuan weapons leh equipment $ 1 billion hu Ukraine hnenah a pe tawh bawk a. Ralthuam leh a hmanrua hrang hrang te Ukrainian sipai tena an mamawh ngawih ngawih te bakah armored vehicles te pawh pek zingah a tel.
Heng ralthuam Ukraine hnena pek te hian rang takin Ukraine a thleng dawn a, Europe a US-in warehouse a neiha a dahkhawmna atangin pek mai tur a ni dawn a ni.
Hengte hi Nilaini a President Joe Biden-an hming a ziah hnan tak tun hnai lawka US Congress in Ukraine tanpui nana $61 billion pek a remtih tak hnuaia mi vek a ni.
US Congress chuan ram dangte tanpui nan $ 95 billion pekchhuah a rem ti a, remtihna pek a nih hma hian a thla a thla Senate-ah inhnialna neih niin a tangkhang reng a, chutih chhung chuan Ukraine indonaah Russia-in hma a sawn duai duai phah tia sawi a ni a. US aid package ah hian Ukraine chauh ni lo Israel leh Taiwan te tanpuina turte pawh a tel a ni.
February 2022-a Russia-in Ukraine a run hnuah US chuan Ukraine hnenah ralthuam $44 billion chuang hu a pe tawh a. Abrams M1A1 battle tanks te pawh a pek zingah a tel a ni.