TikTok Chinese parent company ByteDance te chuan US in video app lar tak chu hralh a nih loh emaw chuan America atanga khap mai tur tia dan a siam hnuah hralh an tum loh thu an sawi.
“ByteDance chuan TikTok hralh kan tum lo” tiin company te chuan an official account Toutiao-ah an tarlang a. A hma pawhin TikTok te chuan dan hmanga khinlet an tum thu an sawi tawh bawk.
A hma lawk erawhin technologhy industry website The Information te chuan ByteDance te chuan US a TikTok operation chu a algorithmn tel lova hralh dan kawng an zawng a ti thung a.
“Foreign media ten ByteDance in TikTok hralh an tum an tih chu a dik lo a ni” tiin company te chuan an thuchhuah an tarlang a ni.
TikTok hralh emaw khap a nih theihna tur dan hi Nilaini khan US President Joe Biden chuan hming a ziah hnan tawh a ni.
Beijing-in private company te a thuneihna a sawhnghet zel chu US leh Western ram te chuan an ngaimawh hle a, Chinese Communist Party chuan ByteDance ah engtiangin nge thuneihna a neih pawh hriat theih a ni lo. Mahse, TikTok chuan Chinese sorkar chu ByteDance ah a inrawlh lo erawh a ti thung.
TikTok chuan ByteDance te chuan share 20% an nei a ti a, 60% vel chu institutional investor te chung zingah chuan US investment firm Carlyle Group, General Atlantic leh Susquehanna International Group te pawh an tel a ti.
A la bang 20% chu an hnathawk khawvel hmun hrang hranga mi te chanpual niin ByteDance board member panga zinga pathum chu American an ni a ti bawk.
Chinese sorkar pawhin US thil ngaihmawh chu sawiselin TikTok khap chuan US ah nghawng chhe zawk a nei ang a ti bawk.
TikTok chu tun tuttutah khap a ni dawn tihna a ni lo va, US chuan ByteDance chu thla kua chhung hun pein chumi hnuah thla thum chhung chu grace period angin hun a la pe leh thei bawk a ni.
ByteDance ten TikTok hralh dawn lo
Get real time updates directly on you device, subscribe now.