US-in Yemen-a Houthi a beih chhunzawm leh

US-in Yemen-a Houthi a beih chhunzawm leh
Houthi chanchinbute chuan United States-in Kamaran Island leh Marib an beih hnuah Yemen khawpui, Sanaa an kap leh tih an puang.
Thi leh hliam leh thil chhia awm erawh engmah an sawi lo.
Sanaa-ah hian US thlawhnate chuan Attan vel vawi hnih an kap a, heng hmun hi kum 2014 atanga hel pawlin an thunun a ni.
US thlawhna hian Asir-a sanitation project pawh an kap a, Furwah veng leh Shoub district-a bazarpui pawh an kap niin Houthi chanchinu chuan a tar lang.
Pathiannia a beih hma, Inrinni khan US hian Hodeidah-a lawngchawlhna leh thlawhna tumhmun chu vawi 13 a kap a. Hemi hma ni thumah khan Hodeidah leh Ras Isa lawngchawlhna kap bawkin mi 80 vel an thi a, mi dang 150 chuang an hliam.
Yemen-a Houthi-ten an awp hmunte hi Washington chuan ni tin deuhthaw a kap a. Civil mite pawh kah niin chhungkaw tam tak an mang a, sipai hmun pawh tihchhiat niin sipai tam tak an thi tawh bawk.
March thlaa US President Donald Trump-a sorkarin Houthi laka beihpui a thlak hnuah mi 200 chuang an thi tawh a. Hetianga thapui an thawh hi hel pawl hian Red Sea-a khawvel sumdawnna bungraw phur lawng an beih thin an tih tawh loh nana an tih niin US chuan a sawi.
November, 2023 atang khan Houthi hian Israel-in Gaza a beih chhan let nan leh Palestinian-te lam a tang tih lantir nan Israel nena inzawm lawng 100 chuang an bei tawh.
Houthi-te hian khawvela lawng hmanga bungraw inthawn 12% vel kalna, Suez Canal-a kalte an bei a, hei vang hian sumdawng lawng lian tam tak chuan beihna pumpelh theih nan kawng hla zawk, South Africa-a Cape of Good Hope an zawh phah.
Kumin kum tira Gaza-a inkahhai puan a nih chhung khan lawng an beih hi an chawlhsan a; mahse, thla hmasa atanga Israel-in thapui a thawh thar leh hnuah beih lehah an vau.
Ansar Allah (Pathian thlawptute) tia hriat bawk, Houthi hi kum 1990 chho vela indin kha niin kum 2014 khan Sanaa lain President Abd-Rabbu Mansour Hadi an paih thla a, an ram a tlanchhiatsan phah.