US inthlan a hnai zel, poll laknaah an la inbei tawk tluang

US inthlan a hnai zel, poll laknaah an la inbei tawk tluang
US inthlan a hnai zel a, presidential candidate pahnihte an la inbeitawk tluang zel bawk.
November ni 5 a president thar thlang tur US ah hian president ni lai Joe Biden chuan a chuh dawn tawh loh thu a sawi hnuah a vice president ni lai Kamala Harris chuan a chuh tur thu a tichiang a, president hlui Donald Trump nen an campaign in a vawrtawp a thleng chho zel a ni.
Inthlan a hnaih telh telh avang hian presidential candidate pahnihte pawhin thapui an thawh mar chho reng a, poll lak hnuhnung berah chuan Kamala dinhmun hi la sang hretin, a hmasawnna erawh a tawlh muang hret hret thung.
Donald Trump hi poll ah hian hniam zawk hretin la awm mahse tunhnaia a hmasawnna erawh a sang chho hret hret zel thung a, a invawrh chhuak zo ang em tih erawh mipui thlir mek a ni.
Poll lak hi inthlan result sawi lawk dikna erawh a nih loh thu a buatsaihtute chuan sawi ve reng bawkin, an dinhmun thlir dun nan erawh chuan thil tangkai tak a nih ve reng thung thu an sawi.