US-Iran inremna la puan chian lohvin rinhlelh la hlawh

Middle East-a indona tihtawp tura US leh Iran inkara inrem lailawkna siam chuan rinhlelh a la hlawh rih viau a, lawngte chuan Strait of Hormuz hawn leh a nih pawhin a pangngai ang taka ringtawk taka zawh leh tur chuan chawlhkar tam tak a la ngai thei tih an sawi a, zawhna tam tak chhan ngai a la awm.
US President Donald Trump-a chuan Thawhtanni khan buaina tihtawp nan US leh Iran chuan inremna an ziak tih a sawi a, a chipchiar erawh puan a la ni lo va, ram pahnihte chuan inremna nghet (permanent truce) erawh siam tur a la ni lo tih an sawi.
Inrem lailawkna hian April thlaa inkahhai puan, ni 60 dang a pawt sei dawn a, February thlaa US leh Israel tang dunin Iran an beih hnua Iran-in a khar, Strait of Hormuz hawn leh a ni ang.
Palaite chuan Iranian nuclear program kalpui zel dan tur thil khirh tak chu ni 60 chhunga inbiakna neih leh turah an sawiho dawn a ni.
Trump-a leh Israeli Prime Minister Benjamin Netanyahu-a ten indo chhan atana an hman thil dang pahnih – Iran-in an chhehvele ralthuam keng pawh an thawhpuina tihtawp leh a missile program tihtawp te chu he inbiakna atana sawiho turah a tel lo nia ngaih a ni.
G7 summit neihna tura France a thlen hnuah Trump-a chuan, “Inremna hi ziah vek a ni tawh,” a ti a. Vice President JD Vance-a chu Zirtawpnia Geneva-ah official-a ziahnaah a tel dawn tih a sawi bawk.
Iran leh Oman inkar tuipui, khawvela tuialhtheih phurh hmuh ngaa thena hmun khat kalna, Strait of Hormuz hawn leh tur thu puan a nih hnu lawkah tuialhthei man a tlahniam nghal a, March 10 hnua a hniam ber a ni.
Inremna hi buaina chin felna atana hmalakna pawimawh ber a ni a, indonaah hian mi 7,000 vel an thi tawh a, a tam zawk hi Iran leh Lebanon-a mi an ni a, khawvel energy sumdawnna a tichhe hman hle bawk.
Iranian President Masoud Pezeshkian-a chuan Thawhtanni khan social media-ah inrem lailawkna chu indona tihtawp nana ‘hmalakna pawimawh tak’ a nih thu a ziak a; mahse, a tak taka inremna tur chu ‘siam a la ni lo’ a ti.
Vance-a chuan CNN hnenah ni hnih chhungin a chipchiar zawka puan a nih tur thu a sawi a. Iran tan ‘hrekna hlihna tur pawimawh tak’ a keng tel tih a sawi a. A hnuah Fox News hnenah Trump-a chuan Zirtawpni hma pawhin puan a ni mai thei tih a sawi leh.
US leh Iranian thuneitute chuan Iran tan eibara hlawkna nasa tak a thlen thei turin ram danga a thil neih khawih theih lova dah hlih leh Gulf-a US sipai awmna hmuna thil chhiate siam thatna tur dollar tluklehdingawn 300 pekte a tel.
US thuneitute chuan Iran-in nuclear ralthuam siam ngai lo tura US phutna chu a tihhlawhtlin a ngai dawn a, Lebanon-a Hezbollah ang chu helho a thlawpna pawh a tihtawp a ngai dawn tih an sawi.
Inremnain Strait of Hormuz a hawn leh dawn hnuah lawng neitute chuan him taka an kal thei tih a chian hnuah chauh an kal dawn tih an sawi.
Japan-a tuialhthei phur tela lawng lian tak 900 chuang neitu, Mitsui OSK Lines chief executive chuan US-Iran inremna chu ‘a rinngam tawk’ tih a chian hma chuan Strait of Hormuz an paltlang dawn lo tih a sawi.
Lebanon-a US thawhpui, Israel leh Iran thawhpui, Hezbollah inkara indona, mi maktaduai 1.2 zet baihvaia an awm phahna chu thil buaithlak tak a ni tel.
Iran chuan inremna siam tur hian helaia indona hi tihtawp tel vek a ngai tih a sawi a; mahse, Netanyahu-a chuan Israel chuan Lebanon chhim lamah a sipaite an awm reng dawn tih sawiin Hezbollah beihnate chhang let turin dikna a nei tih a sawi.
Thawhtanni khan thuthar lakhawmtute hnenah, “Iran hian inhnukdawk turin min duh a; mahse, ka ding nghet tlat a ni,” a ti a. Iran nena remna zawnga inbiaknaah hian Israel hi a tel lo bawk.