US leh Iran aiawhte inbia, chhunzawm tum

Ram pahnihte inkara buaina lian zawk a chhuah mai hlauhthawnna a awm karah US leh Iranian thuneitute chu Oman-ah an inbia tih Iranian foreign minister-in a sawi a, chhunzawm an tum bawk.
Abbas Araghchi-a chuan inbiak bul tanna chu ‘tha tak’ nia sawiin ‘nuclear bik thlur’ a nih thu a sawi a. Ram pahnih aiawhte hi inrawn turin an ram ve veah an kir leh tawh tih a sawi.
Inbiak hma khan US thuneitute chuan Iran-a ballistic missiles leh an chhehvela hel a puihna thin pawh sawi an duh tih an sawi a, hemi chungchangah hian ram pahnihte hi ngaihdan inang lo nei an ni.
Middle East-a US sipaite an inchhawp belh mek laiin inbiak a ni a. Thla hmasaa Iran-a mipui lungawi loh lantirtute Tehran-in a hmachhawn dana a lawm loh thu a sawi hnuah sipaite hi a chhawp hnai a ni.
Tun hnaiah President Donald Trump-a chuan inremna an siam lo a nih chuan Iran chu beihah a vau a. Sipai tam tak bakah indo thlawhna phur lawng lian thlengin an chhehvel hnaihah a luhtir.
Iran pawhin beih an nih chuan Middle East leh Israel-a American sipai hmunhma leh inbunte an bei ve nghal dawn tih a sawi bawk.
Iranian sorkar television-ah Araghchi-a chuan ram pahnih inkarah ‘inrinngam lohna’ a awm a, hei hi ‘chin fel a ni dawn’ tih a sawi a. Inbiak chhunzawm lehna tur chu thutlukna la siam lehtur a nih thu a sawi.
Zirtawpnia inbiakna hi Oman Foreign Minister Badr Albusaidi-a hova neih niin social media-ah ‘Iranian leh American ngaihdan leh hmalak zel dan tur sawi nan an hmang ve ve’ niin a tar lang.
Araghchi-a hian Iranian aiawhte hovin US hian a special envoy Steve Witkoff leh Trump-a makpa, Jared Kushner te a tir ve thung.
Tun hi June thlaa Israel leh Iran indo hnuah US leh Iranian thuneitute an inbiak hmasakna ber a ni a, Israel hma hian US pawhin Iran-a nuclear hmunhmate a bei bawk.