US leh Nigerian sipaiten IS firfiak 175 that

Nigerian sipaiten US nena thawkdunin Islamic State firfiak 175 chu an ram hmarchhak bialah thlawhtheihna atang leh leia atanga beihpui an thlakna hrang hrangah an that niin Defence Headquarters chuan Thawhlehni khan a sawi.
Sipaite chuan US Africa Command nena an beihpui thlaknaah hian kum tam tak chhung he biala helna kalpui tawh, Islamic State West Africa Province-in a hman thin checkpoint, ralthuam dahkhawmna hmun, an hmun pawimawh dang leh sum leh pai siamna atana an hmante an tichhia niin an sawi.
Middle East-a nekchawpna an tawh hnuah Islamic State hian Africa an pan a, kumin thla thum chhunga khawvel puma an chetna 86% hi Africa-a thleng a ni tih Armed Conflict Location & Event Data chuan a tar lang. Nigerian defence ministry thupuangtu, Major-General Samaila Uba chuan thuchhuah siamin, “May 19 thleng khan kan chhut dan chuan ISIS firfiak 175 chu indona hmun atangin paih chhuah an ni tawh tih a lang,” a ti.
May 16-a sorkar pahnihten Islamic State No. 2 tia an sawi, beihpui thlakna leh propaganda enkawltu ni bawk, Abu-Bilal al-Minuki-a thihna thlentu beihna an kalpui hnuah kar tawp khan an che leh a. Hetah hian an hruaitu dang – Abd al-Wahhab, Abu Musa al-Mangawi leh Abu al-Muthanna te pawh a thi bawk tih thuchhuahah chuan tar lan a ni.