US Open hmeichhe inkhel chanchin lawrkhawm

US Open hmeichhe inkhel chanchin lawrkhawm
Thawhtanni atanga khelh tan tak US Open hmeichhe singles lamah tual-chhung tleirawl Coco Gauff leh champion lai Iga Swiatek chuan hneh-nain bul an tan a, Greek eighth seed Maria Sakkari chu tournament ni khatnaa tla langsar ber a ni thung.
Coco major title beiseina
American tleirawl kum 19 mi hian nikum khan US Open quarter-final thlengin, kuminah a major singles title hmasaber tur beiseiin Flushing Mea-dows-ah bul a tan a, German qualifier Laura Siegemund laka set hmasaber a hloh zet hnuah 3-6 6-2 6-4 hnehna nen second round a lut.
American hope-in New York night session-a kum 35 mi German veteran a hneh lai kha a hmunah milar rualin an hual khup a, chu’ng zingah chuan United States president hlui Barack Obama leh a nupui wife Michelle, 2006 US Open champion Maria Sharapova leh boxer Mike Tyson-te chu a langsar zual an ni.
Sixth seed Gauff hian US Open inbuatsaihna Washington and Cincinnati lamah a career-a a title hraw ber ber pahnih a lo sualchhuak tawh a, a grand slam titl ehmasaber tur a beisei leh mekna kawngah tantu ngah ber pawl a ni.
Second round lama Gauff tum leh tur Russian Mirra Andreeva pawh hi tleirawl mai la niin, kum 16 mi lek ni chungin Thawhtannia a bultanna inkhelah a naupanna hmuh tur a awm lo.
Polish top seed Swiatek chuan a title kawl lai humhim tura a chetchhuah vawikhatnaah minute 58 lek chhungin Sweden nula Rebecca Peterson chu 6-0 6-1-in a sawp a, grand slam first round bika a zawna straight-set hnehna tum 16 a chan tlinna chiah a ni.
World number one Swiatek hi tun tournament kal laiah hian Aryna Sabalenka chuan ranking-a hmakhalh theihna hun remchang a nei thei dawn a, chumi thlentir lo tur chuan four-time major champion Swiatek hian tlo tlat a mamawh dawn.
Second round lama Australia nula Daria Saville hmachhawn zui leh tur Swiatek ngam loa dawl zawra zawr unseeded Rebecca khan Arthur Ashe Stadium-ah a ngam loh a tawng chiang hle a, April 2022 atanga la world number one ngar ngar Pole hi champion tura rinkai a ni leh mek.
Tla hma Sakkari
Kum 2021 US Open-a semi-final hial lo thleng ve tawh Maria Sakkari chu women’s draw lama seeded player zinga tla hmasaber niin, Thawhtanni khan 6-4 6-4-in Spanish world number 71 Rebeka Masarova chuan tum hnih ngawt major semi-finalist lo ni tawh hi 6-4 6-4-in a vaw tla.
Ti hian, kum 28 mi Greek nula hi grand slam tournament a khelh hnuhnung pa-thumah first round paltlang zo lo zawngin a tla fai vek a, record chhe tak a ni!
French Open, Wimbledon leh tunah US Open second round lut zo loin a tla a, grand slam hmasaber Australian Open-ah khan third round a paltlang zo lo tawh bawk.
World number eight Maria Sakkari hian a chak loh hnuah inkhelh lai khan court chhunga ganja (weed/cannabis) rim nam vang vang a hriat thu a sawichhuak!
Meizial anga zuk chi ruihhlo lar tak cannabis an tih hi UK lamah chuan Class B drug-a puan a nih avangin kawl, thehdarh, hralh leh chin khap a ni a, chutih laiin US Open khelh mekna New York State-ah chuan kum 21 leh a chunglamte tan khuahkhirh a ni lo!
A chak loh hnua umpire laka ganja rim avanga ‘complaint’ a siam rualin cannabis khu a hipluh erawh a chak loh chhanah a mawhpuh lo thung.
Sakkari hian a kut a hmui loh kal tluan em avangin tennis khelh chawlhsana thawk han lak det lam a ngaihtuah mai thei tih a tarlang tel.
Hnehna nena grand slam rap leh
Kum thum chuang hnua grand slam tournament a khelh leh vawikhatnaah Thawhtanni khan world number one hlui Caroline Wozniacki chuan US Open first round a paltlang a, 6-3, 6-2-a Russian qualifier Tatiana Prozorova hnehin second round a lut.
Chhungkaw din duh vangin Aus-tralian Open champion hlui Wozniacki hian kum 2020 January thlaah tennis khelh a chawlhsan a, kuminah khelmual lut lehin, New York grand slam hi tour-a a kir hnua tournament a hmachhawn pathumna niin, Russian tleirawl kum 19 mi lakah tawnhriat ngah zawk a nihna a chhawr a, 11th seed Petra Kvitova lakah fiahna hautak zawk tura ngaih a hmachhawn zui leh ang.
Kum 33 mi hian kum 2019 hnu lama a inkhelh leh ngai tawh lohna Flushing Meadows-a a han chechhuak leh ta chu a nervous takzet tih inkhelh banah a sawi a, zana inkhelh chu a special hle niin a sawi bawk.
Dane hi tum hnih ngawt US Open runner-up a lo ni ve tawh a, fa pahnih a hrin hnu hian a hmabak la neih hlenchhuakin New York title a hlawhchhuak thei dawn em kan thlir zui zel ang.
Champion hlui veltu Maia
Brazilian 19th seed Beatriz Haddad Maia chuan Thawhtanni inkhel dangah 6-2, 5-7, 6-4-in kum 2017 champion Sloane Stephens a hneh a, Roland Garros semi-finalist Maia hian tualchhung nula dang Taylor Townsend a hmachhawn leh ang.
Inkhel dang
Tournament inbuatsaihna lama dar hliam avanga talbuai tak fourth seed Elena Rybakina chuan US Open bul a tanna inkhelah harsatna lian tawk loin Ukraine nula Marta Kostyuk lakah 6-2 6-1 hnehna nen hna hmasa a hlenchhuak.
He grand slam tournament-a vawi-thum ngawt final khel tawh chunga la champion thei tlat lo Victoria Azarenka pawhin kumin hian seeded 18th ni chungin bul a tan a, 6-1 6-2-in France nula Fiona Ferro a sawp phawt.
Czech 10th seed Karolina Muchova pawhin Thawhtanni first round inkhel dangah 6-4 6-0-in Australian Storm Sanders a hnawtchhuak a; Kvitova pawhin 6-1 7-6 (7-5)-in Spain nula Cristina Bucsa a tukdawl ve bawk.
Swiss 15th seed Belinda Bencic pawh first round paltlang zingah telin Kamilla Rakhimova lakah 6-2 6-4 hnehna a chang a, British qualifier Lily Miyazaki a tum leh ang.
Australian Open finalist lo ni tawh Jennifer Brady pawhin kum 2021 hnu lama grand slam match a khelh leh vawikhatnaah hnehna changin, tun-hnai kum hnih chhunga hliam avanga talbuai deuh reng American hian 6-3 7-6 (7-4)-in Australian Kimberly Birrell a paltlang.