US Open hmeichhe lam inthlifim zel

US Open hmeichhe lam inthlifim zel
Kazakhstan chhuanvawr Elena Rybakina chuan rinkai dang Naomi Osaka laka straight sets hnehna changin US Open quarter-final a lut a, a Grand Slam title pathumna tur leh world number one ranking a um mek chu a hmin teuh deuh deuh a, Sabalenka kut atanga No. 1 nihna chhuhsak turin vawi khat chak chiah a mamawh tawh.
Thawhtanni zan Flushing Meadows, New York-a US Open Round of 16 match pakhatah Rybakina hian Japanese 13th-seeded Osaka chu 6-1, 6-4-in a hneh a, semi-final luh inchuh match pakhat zawkah Olympic champion Zheng Qinwen a hmachhawn leh ang.
Two-time Grand Slam champion Rybakina laka tlawm ta US Open champion hlui Osaka kha an inkhelh laiin khup hliamin a tibuai a, kha khan a tan a tiphet ve pah bawk niin a lang a, kum 2018 leh 2020-a a champion tawhna kuminah a chhunzawm leh thei ta rih lo a ni.
2022 Wimbledon title leh kumin Australian Open title hawna major trophy pahnih hum ve ran tawh Kazakh Rybakina hian Zheng-i a hneh leh chuan tuntum hian champion lo mah se a career-a a vawi khatna atan world number one a ni ve nge nge thei dawn a ni.
Chinese qualifier Qinwen hian last 16 inkhel dangah 0-5 laia hnufual zet chungin six-time major champion Iga Swiatek lakah 7-5, 6-3 comeback ropui a lantir a, second seed Rybakina lakah magic a show zui leh thei dawn em kan thlir ang!
Zheng Qinwen hi world number four laite pawh lo ni tawh mah se nikum July thlaa a kiu zai a nih hnu khan a ranking a tlahniam rawih rawih a, kumin kumtir lam khan world top 100 pawh a luah pha tawh lo a, zai a tawh hnu khan a khelh that dan ang kha a pha lo chho ta tlat a, mahse, Pole a rawn hneh leh nawlh hian hmalam pan zel turin beiseina a siamsak ngeiin a rinawm.
Kum 23 mi Chinese hian karliamta Inrinni pawh khan tualchhung nula rinkai Madison Keys lakah third-round match deciding set an khelh laiin 5-0 bawkin a lo hnufual tawh a, chuta tanga insiamthain round four a lut a, Swiatek lakah pawh Arthur Ashe Stadium-ah kirlehna ropui a lantir chhunzawm leh ta a ni.
Round of 16 match danglehah French Open winner Mirra Andreeva pawh set khatna hloh zet chungin Austrian nula Anastasia Potapova lakah a chak a, a career-a a tum khatna atan New York khawpuiah last eight a lut ve bawk.
Russian tleirawl kum 19 mi Andreeva khan Louis Armstrong Stadium inkhel a thunnun mai thei bik lo a, 24th seed Potapova inhliam a hlawkpui ve ta a; 5-7 6-4 6-3 hnehna a chan hnuah inkhelh banah rilru na taka khelmual chhuahsan tur a tumpuinu chu hnem mawlh mawlh chungin fifth seed Andreeva khan a thlahliam.
Andreeva tum leh tur hi American mihang nula tantu ngah leh hle tur Coco Gauff a ni a, a tan quarter-final awlsam tak zawng a ni hauh lo ang le!
Thawhtanni zan all-American fourth-round match-ah Gauff hian a chipui 14th seed Iva Jovic chu 6-1, 6-4-a hnein a vawi 12-na atan Grand Slam quarter-final a lut.
Fourth seed Coco Gauff hian a Grand Slam title pathumna tur a beisei kal mek a, Arthur Ashe Stadium last 16 match-ah harsatna lian a tawk lo phawt a, quarter-final lamah pawh rinkai zawk a ni leh nghal.
Kum 2023 khan Gauff hian Flushing Meadows-a an ram grand slam tournament-ah a major title hmasaber hlawhchhuakin, an ram title lian a beisei leh mekna kawngah French Open champion laka rinkai zawk ni mah se a chipui Jovic ai chuan Russian tleirawl hi dehkhirh deuh tura ngaih a ni.