US president election-ah Kamala a la sang hret

New York Times leh Siena College in poll an buatsaih, tun hnaia an tlangzarhah president tura Kamala duhtu an tam hret a, vote 49 percent hmu in, Trump duhtu 46 per cent an awm bawk.
He an poll hi September ni 29 atanga October ni 3 chhunga an lakkhawm a ni a, Kamala duhtu tam zawk hian an sorkar hrawn mekin tihzawh loh tam tak a neih a tihzawh theih nana hun pek chhunzawm an duh vang niin an sawi.
Presidential candidate te pahnih hian nasa taka campaign nei mek zelin, hmun hrang hrangah debate pawh an nei nasa tawh hle a, an thusawi leh an thiltum tam tak hmangin mipui rilru an siam chho mek tawh niin, poll buatsaihtute chuan an sawi bawk.
Voters upa lam deuhte chuan a tlangpuiin Republican Trump lam an awn a, mah se Kamala hi hmeichhe namailo tak a nih avangin a thiat bo thei tan mek niin an sawi bawk a, tun dinhmunah pawh Kamala hi tlema a la san hret thu leh a insawhnghet tluan thei a nih chuan inthlan hunah pawh hnehna sang taka a tlin theih thu an sawi.
Candidate pahnihte hi an tawngkam a na chhoin, an inbeihna a na sawt hle a, mimal thil thlengin an insawichhuahsak nasa hle tawh a, poll hrang hrang lakkhawmah pawh an inlehthal zak zak rih ve tho bawk.