US puihna tawp vangin HIV dona a hautak zual hle dawn

US puihna tawp vangin HIV dona a hautak zual hle dawn
US President Donald Trump-a sorkarin ram danga puihna a pek chhuah thin chu a thlakna tur a awm a nih loh chuan HIV bika hmalakna awm tawhte chu kum tam tak dinhmunah a kir leh dawn niin United Nations-in kum tina a tihchhuah thin HIV/AIDS report-ah a tar lang.
Ningania 2025 Global AIDS Update tihchhuahah US-in US President’s Emergency Plan for AIDS Relief (PEPFAR) a tihtawp avang hian kum 2029-ah chuan HIV kai hi maktaduai ruk awm belhin AIDS kaihhnawiha thi pawh maktaduai li an awm dawn tih tar lan a ni.
Report-ah hian tun lai hi ‘kum 30 chuang’ hnua HIV vei leh AIDS kaihhnawiha thi an tlem lai ber a nih thu tihlan a ni.
Hetih lai hian kum 2024 tawp atang khan a tlakhniamna hi a tlem leh tan a, kum 2030-ah vantlang tana AIDS hlauhawmna chu ‘a tawp dawn rih lo’ niin an sawi.
Kum 2024-ah khan HIV vei thar maktaduai 1.3 an awm a, chhut lawk aiin 40%-in a tlem zawk.
Kum 2024-a khawvel puma HIV kai zahve awmna, Africa-a Sahara vela a kai thar chu chhut lawk aiin 56%-in an tlem bawk.
“Ram panga, a tam zawk sub-Saharan Africa-a mite chu kum 2010 an dinhmun atanga 2030-a kai thar 90%-a tihtlem tumna kawngah kawng dik an zawh mek,” tiin UN chuan a sawi.
Ram tam tak chuan nunna chhan nana pawimawh, antiretroviral drug leh damdawi inte la ngah mah se a kai awlsam zual – mawngkawhur, mahni inzuar leh tleirawlte chu himna tura hmalakna chu a buaithlak phah tho va, damdawi in tam tak inkhar a ngaih phah.
PEPFAR hi kum 2003-a President George W Bush-a din kha niin natna pakhat donaa ram pakhat sum seng hnem ber an ni a. UNAIDS chuan he programme hi HIV kai tamna ramte tan chuan ‘nunna’ a nih thu an sawi.