US sum dinhmun khirhkhan viau thei

US Treasury secretary Janet Yellen chuan US leibat theih bituk debt ceiling tihsan a nih loh chuan nghawng na tak a neih tur thu a sawi.
Inremna a awm loh chuan federal sorkar chuan sum a puk ngawt thei lo va, June thlaah chuan US sorkar chuan a sum neih a hmang zo tawh dawna ngaih a ni bawk.
Chutih hunah meuh chuan federal sorkar chuan hlawh, welfare leh sum senna tur hrang hranga pekna tur sum a nei tawh dawn lo a ni.
“Congress hna leh hmalakna tur a ni a. An hlawhchham a nih chuan kan economic leh sum lama chhiatna chu keimahni insiamchawp a ni ang” tiin Yellen chuan a sawi.
ABC News tena an interview naah Yellen chan debt ceiling a inrem tumna chu ”Amerian mipuite an lu a silaia tin chunga siam tur a ni lo tiin a sawi a. Inremna awm theih nana hun chu a tlem tawh thu a sawi bawk.
Thawhlehni hian President Biden chuan Republican leader te hmu dawnin debt ceiling $31.4 trillion a tihsan tumna chu remti turin a ngen leh dawn a ni.
Thla kalta khan House of Representatives chuan debt ceiling tihsanna tur bill an pawm tawh a, chu chu US annual economic output atanga chhutin 120% vel lai a ni a.
President Biden chuan Congress chuan debt ceiling tihsan chu engmah tiamkamna tel lovin remti se a duh a. Tihsan a nih theih nana tiamkamna engmah siam a duh loh thu sawiin budget siam fel hnuah chauh thil dang chu ngaihtuah a tum thu a sawi a ni.
Party pahnih tena inremna an siam thei lo a nih chuan ‘constitutional crisis’ a awm zui ang, tiin Yellen chuan a sawi zui bawk a.
Biden administratoion chuan constitution in Congress remtihna tel lovin leibat theih tihsan chu a remti em tih an ngaihtuah bawk dawn a, mahse, chumi hma chuan tunkarah chuan chumi tel kher lova hmalak dan zawt phawt an tum a ni.
US debt ceiling hi kum 1960 atang khan tum 78 tihsan a ni tawh a, tuna tihsan tum mekah party pahnih te chuan inbiakna an nei mek reng a, inremna an la nei thei lo a ni.
US hian a leiba tum khatmah a la default lo va, leiba pe thei lo emaw ni ta se chuan US mai ni lo khawvel financial market na takin a nghawng ngei dawn thung.