US warship ten Iran siam drone kapthla

US warship te chuan commercial vessel pathum beitu drone pathumte chu Red Sea-ah an kap thla tiin US military te chuan an sawi.
USS Carney chuan heng lawng te hi puiin Iran thlawp Houthi rebel te ta ni ngeia hriat a nih thu sawi a ni bawk a.
Lawng pahnih chu missile in a fuh a, mahse, thi leh hliam an awm lo thung a. Houthi thupuangtute chuan Israel lawng pahnih chu an navy ten an bei tiin a hnuah an sawi thung.
Israel sipaite chuan lawng chu Israel sorkar nena inhnamhnawihna nei lo tiin a sawi thung.
Iran thlawp Houthis te hian kum 2014 civil war atang khan Yemen hmun thenkhatte chu an thuhnuaiah an dah mek a ni.
Tun hnaia Israel in Gaza a Iran thlawp Hamas te a beih hnuah Red Sea a Israel kaihhnawih lawng te chu a bei ta thin a.
Middle East tuamtu US Central Command (Centcom) chuan USS Carney chuan Pathianni zing khan anti-ship ballistic missile chu unity Explorer, Bhamian flagged, UK lawng bulah a puak tiin a sawi a.
A hnuah Carney pana thlawk drone a kahthlak thu a sawi bawk a, Centcom chuan drone hian Carney a thlurbing em tih erawh a sawi lo.
A hnu lawkah Unity Explorer chu Houthi te thunun atanga missile kahchhuahin a fuh bawk a. Distress call a dawn hnuah US vessel chuan drone thlawk lai dang chu a kapthla a ni a ti bawk.
A hnuah UK ta lawng pahnih te chu missile in a kapfuh leh a, USS Carney chuan drone dang a kapthla leh bawk tiin sawi a ni bawk a.
Centcom chuan hetianga drone hmanga lawng beih hian a chhunga multinational crews te chu dinhmun derthawngah siamin international commerce leh maritime security tan pawha hlauhawm a ni a ti bawk a.
“Heng inbeihna te hi Yemen atanga Houthis te tih vek niin Iran in ralthuam a pek vek te an ni” tiin a tarlang bawk a.
“United States chuan international allies leh partner te nen na takin a chhang let zel dawn” tiin tarlan a ni bawk.
A hma lawk pawhin US chuan an warship in Yemen coast a Israeli-linked tanker mantu ralthuam keng te lakah lawng a chhuah zalen thu a sawi bawk.