USS Milius-in South China Sea paltlang

US indo lawnglian USS Milius chuan China-in Taiwan thliarkar leh a chhehvel hnaiha indo nunchan a zir a zawhfel tuk lawkah Taiwan Strait paltlangin US Navy te chuan zin kawng pangngai zawh mai an nih thu an tarlang nghal.
China chuan Taiwan hi a ram anga a chhal niin tun hnaiah Taiwan leh a chhehvel hnaihah sipai nunchan nasa taka zirna neiin hei vang hian harsatna a siam a ni.
China in hetianga sipai nunchan a zirna chhan hi tun hnaia Taiwan President Tsai Ing-wen-i’n USA a tlawh a, US House of Representatives Speaker Kevin McCarthy nena inbiakna an neih vang a ni a, hei hi China chuan a ram chhung inrelbawlna lama inrawlh tumna angah ngaiin Taiwan chu China atanga inlakhran a tumna thlawpna anga a ngaih a ni.
U.S. Navy’s 7th Fleet te chuan Arleigh Burke-class guided-missile destroyer USS Milius chuan ‘Taiwan Strait a paltlang’ tia sawiin he lai hmun hi international water niin international law hnuai awm niin freedom of navigation awmna a ni a ti bawk.
US indo lawng lianin Taiwan Strait a paltlang leh hian US-in a Indo-Pacific zalen awm se a duhna lantirna anga ngaih a ni bawk a. US Navy te hian thla tin tum khat tal Taiwan Strait hi an paltlang ziah tlangpui a, helai hmun hi South China Sea huam chhung leh China in a ram anga a chhal a ni.
Kar kalta khan USS Milius hian South China Sea a mihring siam chawp leh China thunun mek thliarkar Mischief Reef hnaih takah a kal bawk a, hei hi Bejing chuan a sawisel nghal a ni.
Taiwan Strait hnaiha sipai nunchan zirna a kalpui zawh hnuah pawh China chuan Taiwan hnaihah ralthuam a la chhek khawl thova, mahse, a hma anga tam tham erawh a ni lo thung.
Thawhtanni zing lam khan Taiwan defence minstry chuan Taiwan hnaihah Chinese military aircraft 18 leh indo lawng pali an a hmuh thu an sawi a.
China hian Taiwan hi a ram anga a chhal niin nikhat chu mainland China nena la inbelhbawm tura a ngaih niin a tul a nih chuan Taiwan thunun nana tharum pawh a hman mai tur thu a sawi bawk a.
Taiwan erawhin mahni inrelbawl ram angah inngaiin thliarkar mipuite chuan an inrelbawlna leh hma lam hun kal zel turah thuneihna an nei an inti ve thung.