USS Theodore Roosevelt strike group ten South Korea lut

Nuclear-powered United States aircraft carrier chuan military exercise nei turin South Korea a lut ta a, hei hi tun hnaia North Korea leh Russia inlaichinna siam that zel avanga vauna awm thei te chhanna anga ngaih a ni.
USS Theodore Roosevelt strike group te hian Busan an lut tawh a. A hma lawkin South Korea chuan Russian Ambassador chu Russian president Vladimir Putin leh North Korean leader Kim Jong Un tena indona an tawhin ralthuam lama inpuihtawn thuthlung an ziah chungchangah thu zawtfiahin a ko a ni.
South Korea chuan North leh Russia inremna siam chu a security atana hlauhawm tia sawiin chuvangin Russia Ukraine a run mekah Ukraine thlawpin ralthuam a thawnluh mai theih thu a sawi a, chu chu Putin chuan a haw hle a, a chhang let nghal bawk.
June thla tir khan Singapore-ah United States, South Korea leh Japan defence chief theuhte chuan meeting neiin sipai nunchan zir Freedom Edge tih chu neih ni se an ti a. He sipai nunchan zir hmang hian ram pathum sipai te chuan boruak, tuipui leh cyberspace ah te thawhho zui zel dan tur te an lantir dawn a ni.
Theodore Roosevelt strike group te hi Freedom Edge-ah chuan an tel dawn a, June thla chhung ngei hian neih ni tura ngaih niin mahse South Korea military chuan kimchangin engmah sawi a la nei lo thung.
South Korea chuan Theodore Roosevelt-in an ram a lut chuan an allies te nena an defence chakzia a pholang a, North Korea vauna karah chetlak an inpeih zia a pholang tiin a sawi a. Thla sarih kalta khan US aircraft carrier dang USS Carl Vinson chuan South Korea hi a lo tlawh tawh bawk.
Theodore Roosevelt strike group-te hi April thla khan East China Sea a South Korean leh Japanese naval forces te nena sipai nunchan zirnaah a lo tel tawh bawk.
North Korea inluling mekah United States, South Korea leh Japan te chuan training neih tizau zelin helai region velah US military assets te hmuh theihin an awm reng bawk.
Tun hnai kum chhova North Korea inluling leh China-in Taiwan rumthaih leh South China Sea a nasa zawka a inlulin reng avangin South Korea, Japan, Philippines, Taiwan te chuan tun hnaiah nasa zawka inhnaihna neiin tuipui ram inchuhna boruak pawh a sosang chak hle bawk.