Uttarakhand-a vurin a chhilhte hmu kim

Uttarakhand-a vurin a chhilhte hmu kim
India hmar lam hmun kilkhawr taka vur tawlhin a chhilhte chu Pathianni tlai khan hmuh kim an ni ta a, khaw vawt uchuak taka chhanchhuah hna thawh chu tihtawp a ni ta.
Himalaya tlangdunga awm, Uttarakhand-a Tibet nena an inrina bul lawk, Mana khaw bula hna thawka inkulh mi 50 chuang hi Zirtawpni khan vurin a chhilh a. Mi pariat an thi ta a ni.
Thuneitute chuan vur tawlhin a chhilhte hi a tirah mi 55 tiin an puang a, a hnuah 54 zawk an ti leh a. Hei hi an zing pakhat chu vurin a chhilh ve hmain an khuaah a lo haw hman tih hriat chhuah a nih vang a ni.
Inrinni khan chhanchhuah hna thawktute chuan mi 50 an la chhuak hman a; mahse, an zinga pali chu an hliam tuar lovin an thi zui tih Indian army chuan a puang.
Pathianni khan rescue team-ten ruang dang an hmu leh a, drone hmang detection system and leh rescue dog nen an thawk chhuak tih an sawi a. Ruang hi an hmu kim ta a ni.
Vurin a chhilhte hi China ramri hmaa India ram china khaw tawp ber, Mana atanga km 50-a thui kawngpui, Mana Pass zauh hna thawktute an ni a, state pawn lam mi tam tak an awm.
An hnathawhna hmunah hian steel container chhungah an awm mai thin a, hei hi khaw awm dan uchuak tak lakah puanin aiin a him zawk vang a ni.
Lei a nghing dur dur a, an awmna container chawpin an tawlh ta niin chhanchhuah zinga mi, Anil chuan a sawi.
“A tirah chuan eng nge thleng ka hre mai lo va; mahse, tukverha ka hawi chhuah chuan kan velah vur chhah tak a lo awm ta a ni,” tiin kum 20 mi hian AFP news agency hnenah a sawi.
Vur chhah takin a delh avangin an awmna container chungte pawh chu a kul hniam zui niin a sawi a. “Vurin min han khuh phui vek hnu kha chuan dam chhuah leh inbeiseina kha a bo vek a ni,” a ti a. Dama an chhuak leh chu ‘mumang ang mai’ niin a sawi.
A thawhpui, Vipan Kumar-a pawhin vur chhah takin a khuh avangin boruak a awm si lo va, ‘tawpna tur’ ni ngeia a ngaih thu a sawi ve bawk.
Himalaya tlangdung hi a rinawm tawk lo hle a, khawvel lum zelin vur tawlh thut leh tui lian thut a thlen nasa zual ta bawk.
Kum 2021 khan Uttarakhand-ah tho hian vur tui tam tak chu luiah a luang lut thut a, sabereka khuangkaih lian tak siamin mi 100 dawn a lo hnawl hlum tawh.
Kum 2013 pawh khan fur ruahtui tam tak surin tui lian leh lei min nasa tak thlenin mi 6,000 vel an thi a. Hemi tum phei hi chuan an state-a hmasawnna hna thawh an hmang chu ennawn tura tihna thawm a rin phah hle.
Kum 2022 khan Uttarakhand-ah tho hian vur tawlhin tlang lawn zir mi 27 a hnawl hlum tawh a, kum 2021 khan vur tuiin sabereka khuangkaih a thlenah mi 200 chuang an thi tawh bawk.