March 8-ah hmeichhiate Rs. 2,500 pek tur tan dawn

March 8-ah hmeichhiate Rs. 2,500 pek tur tan dawn
Delhi-a BJP sorkarin mi rethei chhungkuaa hmeichhiate hnena tanpuina thla tin Rs. 2,500 pekna tur chu March 8 atangin an kalpui tan dawn tih an party MP Manoj Tiwari chuan Pathianni khan a sawi.
Delhi Aassembly inthlanah khan BJP hian thuneihna an chang a nih chuan Mahila Samriddhi Yojna hmingin hmeichhe retheite hnenah thla tin Rs. 2,500 pek an lo tiam tawh.
Tiwari-a chuan PTI Videos hnenah, “Inziah luh hi March 8 atangin tan a ni ang,” a ti.
Pek tur list siam a ni ang a, thla khat leh a chanve chhungin kalpui tur ang chi zawng zawng chu tihfel vek a ni dawn tih a sawi a, a dawng thei tur ang chi chu inziak lut vek turin a sawm nghal.
Hetih lai hian eptu, AAP chuan BJP sorkar chuan an cabinet thutkhawm hmasak berah prime minister-in a tiamte ti turin thutlukna an siam lo tiin an lo sawisel tawh.
Delhi Chief Minister Rekha Gupta chuan AAP sorkar liam ta khan engmah hnutchhiah a nei lo tih a sawi a; mahse, BJP sorkar thar chuan mipui hnena an tiam zawng zawng an ti vek dawn tih a sawi thung.
AAP thupuangtu, Priyanka Kakkar-i chuan BJP chu thuneihna an chan hmaa mipui hnena an intiamna hre reng turin a chah a. “Inthlan hma khan BJP hian Delhi-a hmeichhia zawng zawngte chu March 8 atangin thla tin an account-ah Rs. 2,500 dahsak zel an tiam a. LPG cylinder pawh Rs. 500-a tih an tum a, Holi leh Diwali-ah chhung tin tan a thlawnin cylinder pek an tum bawk a. Chief Minister Rekha Gupta-i hi heng an intiamna tihlawhtling turin hna a thawk tan tur a ni,” a ti.
Delhi BJP President Virendra Sachdeva chuan chhangin AAP hruaitute hi inthlana an chak loh hnuah hna nei lo an ni ta a, tunah chuan ‘phuahchawp thil’ vawrh darhin an hmanhlel ta niin a sawi.
BJP chuan manifesto-a an intiamte an hre reng a, an tihlawhtling ngei dawn tih a sawi bawk.