Uttarakhand vur tawlhah paruk thi tawh

Uttarakhand vur tawlhah paruk thi tawh
Zirtawpni tuka Chamoli district, Uttarakhand-a Mana khaw bula vur tawlh thuta thi chu mi paruk an tling ta.
“Sipaiten vur kara mi zawn hna an thawhnaah ruang pakhat dang an hmu leh a, ruang hi Mana-ah lak a ni a, mi pathum chin hriat a la ni lo,” tiin Lt Col Manish Shrivastava, PRO (Defence) Dehradun chuan Hindustan Times a hrilh.
Army, ITBP, Air Force, NDRF leh SDRF ten chhanchhuah hna leh mi zawn hna hi an la thawk chhunzawm zel a ni.
Uttarakhand Chief Minister Pushkar Singh Dhami chuan Pathianni khan IT Park, Dehradun-a Disaster Control Room chu tlawh lehin Border Roads Organisation (BRO) thawktu tang mek chhanchhuah hna thawh a enpui a, Inrinni khan a tlawh tawh bawk.
Chhanchhuah zinga mi, Joshimath Army Hospital-a awm mek, Vijay Pandey chuan, “Container chhunga kan awm laiin vur hian min tawlhpui a, mi pakua kan ni a, kan zinga pali chu hetah hian kan awm mek a ni,” tiin ANI a hrilh.
Indian Air Force (IAF) chuan Pathianni khan drone-based intelligent buried object detection system chu mi zawn nan a thawh chhuahpui tan a. Joshimath-a SDRF communication team chuan Shri Badrinath Dham atangin mi zawnna hmanrua nen a hmun an thleng bawk.
State sorkar chuan van sang atanga thawk turin MI-17 helicopter, Cheetah helicopter pathum, Uttarakhand sorkar helicopter pahnih lehAIIMS Rishikesh air ambulance a chhawp a. Chief Minister Dhami chuan a tul chuan a dang pawh ngaihtuah turin a ti.
SDRF Inspector General of Police (IGP) Ridhim Agarwal chuan Sahastradhara atangin Victim Locating Camera (VLC) leh Thermal Image Camera nen mi thiam an thawk chhuah tih a sawi.
Sipaite chuan Mana base camp bula helipad chu hmanhmawh thila hman turin an ruahman vek tih an sawi.
Hetih lai hian vur tla chhunzawm rengin hna a tisawt lo hle a, Badrinath-ah chuan 6-7 feet vel tlain kawngpui tam tak khar a ni tih ANI chuan a tar lang.
Uttarakhand Sub Area GOC Major General Prem Raj leh Brigadier Harish Sethi chuan sipaiten hna an thawh dan enpuiin State Emergency Operation Centre (SEOC) an tlawh.
Chamoli District Magistrate Sandeep Tiwari chuan BRO hna thawk chhanchhuah zinga 24 chu Joshimath-ah enkawl an nih thu leh pakhat erawh air ambulance hmangin AIIMS Rishikesh-ah lak a ni tih a sawi.
Inrinni khan Dhami chuan chhiatna thlenna hi thlawhna atangin a thlir a, Army Hospital-a enkawlte chu a kan bawk.