By Dr. C. Lalrampana
A KAMKEUNA
Mizo hnam damna lam hi a pawimawh hle. Hnam inpumkhatna (National integration) tichhe zawng emaw chi inlakbingna (Communalism/communal feeling) tichhuak zawng ni si lova Mizo hnam damna hi kan ngaih pawimawh a hun takzet ta e. Mizo hnam dam khaw chhuahna tura pawimawh tak kan intodelh theih si, hnamdangin min chan khalh tlat hi tharum tel lova kan pumbilh theih dan kawng hawi zawnga inzirtir a hun tawh hle.
-- Advertisement --
MISTIRI AWMZIA CHU?
Mstiri kan tih hi Gujarati thumal ‘Mistri emaw Mistry’ atanga lo lãr chho niin, anniho hian Portuguese thumal ‘Mestre’ tih atanga an lak chhãwn veleh a ni. Saptawng chuan ‘Master/teacher emaw ‘Supervisor’ tih emaw a ni thei awm e. Mizotawng chuan ‘Hotu; Zirtirtu; endiktu; enkawltu emaw kut hnathawh peng hrang hranga thiam nãl tak, kawng hmang hria, mite zirtir chhawng zel thei khawpa hre bel, mahnia hma la thei’ ti ila a dik zaw ber mai awm e. Hetih lai hian vai misiri tam tak finfiah lem lova Mizoramin kan lo pãk huan huam thin hi a tam zawk chu misitiri puitling zuia thla hnih khat vel helper-a tang, MISTIRI bungraw pawimawh zualpui nen thawk chhuaka intimistiri chawp mai mai an tam a; Mizo MISTIRI erawh Synod Social Front (SSF) leh Central YMA hmalaknaa uluk taka trained chhuahtirte an ni. Chuvangin, vai cement mistiri nazawng hi ngaih tha taka lo chhawr chi a ni lem lo tih kan hriat a pawimawh hle.
TUNGE THIAM ZAWK?
Tãrlan tawh ang khian Cement MISTIRI puitling thiam nãl tawh chinah chuan Mizo Cement MISTIRI-te hi an thiamna (skill) a tha zawk a, mitthlaa suangtuahna (idea) an nei tha a, an rilru a chakin an fing (intelligent) zawk a, chakna leh theihna (ability/potential) an ngah zawk a, an tling/tlãk (efficient) zawk a, mahni inrintãwkna (confidence) an ngah zawk a, hmalam hun thlir lãwkna (vision) pawh an nei tha zawk tlangpui. Mahse, vai mistiriri angin tawrh theihna leh dawhtheihna (tolerance/patience) an nei tlem a, thunun kawngah an awlsam (flexible) tãwk lo bawk. Tin, hun vawn dik (punctuality) kawngah inpalzut an ching deuh zawk bawk niin a lang. Hei bakah hian ei leh in chhia hi an tei thei lo zual bawk.
PUMBILH DAN TUR
Kan CM hlui zahawm tak Pu Hawla khan kan rama Karimganj tlangval tam lutuk tharum thawh si lova tihtlem dan tur a sawi fo chu Cement mistiri tur Mizo tlangval kan chher chhuah tam hi niin a sawi thin a, a dik hlein a lang.
Thing mistiri (Carpenter) lam chu Pathian zarah kan in todelh hle a; in tin deuh thawah thing mistiri kan awm emaw tih theih hial a ni. Hetih lai hian Mizo cement mistiri erawh kan la tlem hle. Central YMA leh Synod Social front -te thahnemngaihnain a thlawnin Mizo tlangval engemaw zah chu Cement mistiri chherchhuah an ni tawh a, mahse an la tam tawk loh avangin Karimganj tlangval an la tam belh zel niin a ngaih theih. Chuvangin, vai cement mistiri luahlan thei khawpin Mizo Cement MISTIRI chher chhuah vat theih ni se; Mizo cement mistiri thawk mek tawhte pawh hian vaiho ang bawkin thlarau rah dawhtheihna (Gal. 5:22) neiin vaiho an la phaklohna lai la awm kan han tarlan takte khi vaiho aia tha zawka ti thei turin tihtakzetin tan la thar sauh sauh se, insatute pawhin mahni mizopui chauh lo chu chhawr lo ngam theuh ta ila chuan that zawng (quality) inang rau rauah mahni Mizopui chu kan chhawr duh vek zawk ang a, chutianga ram leh hnam rilru pua chhawrtute leh thawktute kan inthurual thap chuan hnamdang cement mistirite hian thawh tur an neih miau loh chuan tharuma um haw ngai lovin anmahni chenna hmun lamah an haw zeuh zeuh anga an kuta mizopain mawhphurhna tam tak kan dah mek hi kan pumbilh thei mai dawn a ni.
A TLÃNGKAWMNA
Engpawhnise, thiam dan inchen rau rauah Mizo tlangval chuan rem a hre zawk a, a thawk chakin a taima zawk a, mahse, kal hma leh haw tlai lamah dawh theihna an nei tlem a, tlemin thunun an har duh zawk tlangpui niin a lang.
Karimgangj tlangval chuan sum a hmuhna tur a nih phawt chuan enganga vin leh ankhum pawh hrehawm tiru hle thin mah se ngawi rengin dawhthei takin a sepui ruah tuar tlawk tlawk a; a tuar chhuak thin.
Mizo tlangval hi thunun awl (flexible) ve phei ila chuan in sa apiang hian kan ruai duh vek zawkin a rinawm. Mizo Cement Mistiri zir chhuak tam takin chhawr zui an hlawh lohna chhan ber pawh thunun an ngai thei lo hi a ni thei.
Tin, a pawimawh dang leh chu an ni tin hlawh intam hleih hi a ni. Hausak dan a inchen lova, neih chuang liama a ruala in pahnih pathum sa thei an awm laiin 95% te hi chu neih chhun tak meuha in sa kan ni tlangpui a, chuvangin, vai mistiri ni khat hlawh ang tho hlawh hian thunun nuam taima bawk siin thawk thei ve se’ng chuan mahni mizopui chhawr kan tam tial tial ang a, a tawpah chuan Mizo tlangval hlirin keimahni ram Mizoram ngeiah hian Concrete Building ropui leh nalh tak tak an sa ngaw khup mai dawn a lo ni.
Mizo tlangval hlir Cement Mistiri & Helper kan hman/chhawr theih hunah chuan vai mistiri-in thawh tur a hmu tawh lovang a; intualvuak chiam emaw tharum thawh ngai lovin Karimganj lamah leh state dangah ei zawng turin an bo diak tawh ang a, tichuan, vai mistiri vs Mizo mistiri’ tih chhanna chu “Mizo tlangvalin hnehna a chang ta” tiin hnehna Darkhuang kan tum thei tawh mai dawn a lo ni e.