Vairama hnathawh dan nen chuan Mizorama hnathawh dan a tlem hle – Lalrinpuii

Vairama hna an thawh thin dan ngaihtuah chuan Mizorama sawrkar hnathawk thenkhatte hna thawh chu a tlem hle tih minister Lalrinpuii chuan a sawi.
Social welfare, Tribal Affairs, Women & Child Development minister Lalrinpuii hian Thawhtanni khan District Child Protection Unit, Lunglei District office a tlawh a. DCPU hotuten an hnuaia hmalakna an lo hrilh a; tunah hian mi 27 thawk mekin, Child Welfare Committee leh Child Helpline phone number – 1098 an kalpui dan bakah, adoption agency, thlatin Rs. 4000 dawn theihna naupang sponsorship kalpui dan, Observation leh Special Home hrang hrang 6 awm chungchang leh aftercare an buaipui dan an sawifiah.
Minister chuan state leh district level-a hmalakna an lo zirchian thu sawiin, a hmun ngeiah Home thenkhat pawh a tlawh tawh thu a sawi a, an harsatna chinfel dan tur kawng a zawnpui mek tih a sawi.
Chhantu neilo naupangte tan Juvenile Justice Rules chu cabinet thutkhawma siamthat tum a ni, tiin, staff hrang hrang harsatna chinfel dan tur kawng a zawnpui tih a sawi bawk. Vairama hna an thawh thin dan ngaihtuah chuan Mizorama sawrkar hnathawk thenkhat thawh chu a tlem hle a, chuvangin inthlahdah loa, tun aia tha zawk leh nasa zawka thawk turin a ngen tih a sawi.
Hemi hnu hian hmeichhe rahbi tleute chhawmdawlna in – SHAKTI SADAN, Bazar Veng Lunglei ami a tlawh a. A enkawltuten an harsatna an lo thlen.