Vairengte – Sairang kawng en

PWD minister Vanlalhlana chuan Mizoram chak lakna kawngpui pawimawh, National Highway 06 & 306 Sairang atanga Vairengte inkar chu Zirtawpni khan a enfiah a. Department hotute leh NHIDCL nen kawng chhe lai siamthat dan tur an sawi ho.
Minister chuan Vairengte – Sairang inkar NH-306 & 06 chu Mizoram mamawh chakkhai lakluhna kawngpui pawimawh a nih avangin siamthat thuai a tul tih a sawi a. Lirthei lian, thil rit tak tak phurin a zawh reng avangin a chhe chak hle a, kumin fur thlen hma ngeiin thawmthat hna thawh zawh hman a nih theih nan, hmalakna awm mek pawh chak zawka kalpui turin PWD hotute leh NHIDCL a chah. Contractor-te pawh kawng siamthat nan lungchang tha leh hmanraw tha chauh hmang turin a chah bawk.
Vairengte atanga Sairang inkar kawng hi km.122-a thui a ni a. Km. 67.20-a thui chu NHIDCL kutah awmin, km. 54.80-a thui Mizoram PWD kutah a awm. PWD hian a theih ang angin kawng thawmthat hna thawk thinin, kumin fur hma hian PWD leh NHIDCL hnuaia kawng awmte chu ngawrh zawka siamthat tum mek a ni.