Union Home minister hnenah thlen Rajya Sabha-ah sawi min phalsak lo – K Vanlalvena

Mipui huap kim zawk leh bill tam zawk lak theihna tur health care scheme thar duan mek a ni tih Health & Family Welfare minister Lalrinpuii chuan a sawi a. Tangkai zawka Cancer Hospital hmang turin post siam belh tul buaipui mek a ni tih a sawi. Parliament session kal mekah Rajya Sabha MP K Vanlalvena chuan India sawrkarin Indo-Myanmar ramri hung kalpui a tum chu Mizoram mipui duhdan a ni lo a, he thutlukna hian Zoram mipui a thawng hle tih Home minister Amit Shah hnenah ziakin a thlen.
British sawrkarin dik lo taka ramri min siamsak avangin Zofate chu India, Burma leh East Pakistanah tihluihnaa thendarh kan nih thu leh, he ramri diklo tak hi India independence tirh atanga tun thlenga siamthat a la ni lo chu hnam anga inrahbehna a nih thu K Vanlalvena hian Amit Shah hnenah hian a thlen a. Ramri diklo hi siamtha a, rorelna pakhat hnuaia awm kan nghah reng lai a, ramri hung tumna awm hian Zofate a barakhaih tih a sawi a ni.
India independence hnu kum 75 chhung zalen taka kan lo inkalpawh thinna, Free Movement Regime tih tawp tumna pawh ramri bulhnaia chengte ve ve tan harsatna nasa tak a siam tur thu a thlen bawk.
Indo – Myanmar ramri hung hian ramri kaltlanga dan loa sumdawnna hrang hrang, ruihhlo leh ralthuam tawlhruk thinte a tihtawp beiseina avang a nih chuan, fencing hian chu’ng sumdawnna chu a tawp phah dawn lo tih Bangladesh border fencing siam zawh tawh atangin a hriat theih thu leh, Bangladesh ramri kaltlanga ralthuam tawlhruk vawi tam tak ramri vengtuten an man thin dan atangin a lang fiah tih Mizoram MP hian Union Home minister hnenah hian a sawi.
‘Myanmar nena kan inrina hi hung a nih chuan, kan sangha manna tha tak, km. 500 a sei ramria luang mek kan lui hi ramri pawnah dah a nih dawn avangin kan hloh dawn tihna a ni a. Hengte avang hian ramri hung tumna hi Mizoramah tih loh nise,’ tiin a thlen.
Indo-Myanmar hungna siam tumna hi thulh tura ngenna all party leaders thutkhawmah MP K Vanlalvena hian a lo sawi chhuak tawh a. Parliament Session kal mekah Rajya Sabha-ah auchhuah pui turin dilna vawi li a thlen chungin hun pek a ni lo. “Lok Sabha lamah Indo-Myanmar hung tum a nih thu central minister-ten an sawi chhuah laiin, chumi chungchang sawi chhuah phalsak ka ni lo hi India hmarchhak tlangmite dikna zah lohna ni hialah ka ngai a ni,” a ti.