Vance-a’n India leh US inkawmngei \ul a ti

Vance-a’n India leh US inkawmngei tul a ti
US Vice-President JD Vance chuan kawng hrang hranga ram pahnihte inkawmngeih zel a tul thu sawiin India leh US hian kum zabi 21-na ‘muanawm leh tha zawk’ a awm theih nan hlawhtling taka thawhho an mamawh tih a sawi.
Ni li cham tura India tlawh mek, Vance-a hian Thawhlehni khan khawthlang lama Jaipur khawpuiah hun hmangin thu a sawi.
“Kan thawhhona hi a hlawhtling lo a nih chuan kum zabi 21-na hi mihringte tan hun thim a ni thei dawn a ni,” a ti.
Vice-president-in hetiang a sawi hma ni khan Indian Prime Minister Narendra Modi nen inkawmin ram pahnihte hian sumdawnnaa inpawhna tur sawi dunin Delhi chuan tariff sang tak pumpelh theih a inbeisei.
India hi President Donald Trump-a’n tariff a tihsan vak ni 90 chhung a tihtawp leh mek chhunga US nena sumdawnna kawnga hmin tuma dawrtu zingah a tel a. Tariff tihsan kalpui rih loh tur chhung hi July 9-ah a tawp dawn a ni.
Tihtawp lailawk leh a nih hma khan India bungruate US-a phurh luhna chu 27%-in tihsan a ni a. Hemi hnu atang hian Delhi leh Washington hi sumdawnnaah inhriat thiam tawnna nei turin an indawr zui nghal char char a ni.
Jaipur-a thu a sawinaah hian Vance-a chuan ram pahnihten inhriat thiam tawn theihna tur an tifel tih a sawi.
“Hei hi kan ram hnih thawhhona tihfel tur atana kawng pawimawh a nih avangin President Trump leh Prime Minister Modi-a hmathlir tihhlawhtlinna tura rahbi pawimawh a ni,” a ti.
Modi-a chu inremna awm theih nana ‘beitu khirh tak’ a nih thu sawiin ‘tum hlen tum ngar ngar’ tiin a sawi bawk.
Modi leh Trump te hi mi mal taka inpawh tak niin Indian prime minister hi Trump-a president a nih leh hnua ram dang hruaitu zinga tlawh hmasa pawl a ni a. Hetih rual hian US president hian India lakah tariff tihsan chu a tum thu sawiin ‘tariff king’ leh sumdawnna inremna ‘tibuaitu lian’ tiin a sawi a ni.
India hian US atanga bungrua a lak luh man chu tam tak a tihniam tawh a, Trump-a tihlawm tum nan tam zawk tihhniam leh a tum bawk a. Hetih lai hian agriculture thil, Washington-in tam zawk pawh a duhna tak chu India hian a hum tlat a, hei hi an mutan pawh a ni.
Vance-a hian Jaipur-a thu a sawinaah hian US chuan Delhi hnenah energy leh ram venhimna tam zawk hralh a tum thu pawh a sawi a. Thawhtannia Modi-a nen an inkawmnaah khan sumdawnna thil bakah rem venhimna, technology leh energy pawh an sawi dun a ni.
Indian prime minister hian Vance-a nen an inkawm zawhah hian kuminah Trump-a’n India a tlawh a beisei thu pawh a sawi a. Delhi hian kumin kum tawpah Quad summit a thleng dawn a, US president pawh a tel rin a ni.