Vanghmunah Cultural Meet hmang Kan tam theihnan pian pun a ngai – C Lalsawivunga
Vanghmunah Cultural Meet hmang
Kan tam theihnan pian pun a ngai
– C Lalsawivunga
Tripura Vanghmuna Cultural Meet hmanpuitu minister C Lalsawivunga chuan Mizo kan pun theihnan nupa kara nau piang kan pun a ngai tih a sawi.
Mizoram Art & Culture department leh Tripura Group YMA tangdun buatsaihin Zirtawpni khan Vanghmun Jampui tlangdungah Cultural Meet neih a ni a. Tripura Group YMA huamchhunga YMA branch hrang hrang an tel.
Hmanpuitu Art & Culture minister C Lalsawivunga chuan ram hrang hrangah awmin inrelbawlna ramriin min kar dan mah se, insuikhawmna rilru pu chunga thinlunga inpumkhat zel tur leh, Mizo nun zemawi vawnghima aia upa zah kawnga tan la zel turin a fuih.
“State dangah awm mah ula, in tan Mizoram sawrkar a ding reng dawn. Khawi hmunah pawh awm ila, hnam tangrual kan nih hi a pawimawh. Kan hnam hi hnamdangin min zahna tur chuan tam a ngai. Kan hnam kan pun theihnan nupa kara nau piang kan pun a ngai a, tlang takin helamah hian tan kan a lak a ngai,” a ti.
Cultural Meet-ah hian YMA branch – Vanghmun, Hmunpui, Vaisam, Phuldungsei, Hmawngchuan, Sabual, Bangla Zion, Behliangchhip, Tlangsang leh Tlaksih an tel a; Mizo hnam lam chi hrang hrang entir niin zai ngaihthlak a ni bawk.
Tripura Group YMA huamchhungah hian YMA branch 19 an awm a, YMA member 3000 vel an awm a ni.