Vawiina Singapore mikhual tur Blue Tigers

Vawiina Singapore mikhual tur Blue Tigers
2027 AFC Asian Cup khelh phak tuma tan khawh mek India chuan kar liamta Ningani khan qualifier away match-ah 1-1-in mualneitu Singapore an inhnehtawkpui a, zanin hian Goa khawpui pakhat Margao-ah return-leg match khelin Singapore bawk hi an mikhual ve thung dawn a, Asian Cup khel turin beiseina an la neih chhunzawm ve zel.
Mizo player pahnih Lallianzuala Chhangte leh Hmingthanmawia Ralte telna India national football team hian Group C bul an tanna inkhelah goal awm loin thenawm Bangladesh tihte mai mai an inhnehtawkpui hnuin Hong Kong lakah sikhat faiin an tlawm leh a; kar hmasaa Singapore an inhnehtawkpui leh nen khelh thum atanga point hnih hum chungin Asian Cup tournament tak tak khel turin beiseina chau angreng tak an la neih chhunzawm zel.
Ningani zan Singapore khawpuia Singapore Asian Cup qualifier-ah khan tlawm thei mai dawna ngaih an nih hnu hun tawp lam hnaihah Blue Tigers siphurh chu Rahim Ali chuan a sut hlauh a, home team tlarhnung pherh an nang fuh a, away point khat hlu tak nen zanin game an nghak thei ta a ni!
Singapore lam hian chawlhlawk dawn first half hun pekbelhah Ikhsan Fandi goal hmangin ham an hruai a; second half tawp dawn minute 90-na a kal mek lain Rahim Ali chuan Singapore player Jordan Emaviwe tihsual hlawkpuiin India siphurh a sut thei hram a ni.
Khalid Jamil-a team hian Singapore an pan hmain team member kim thlapa training hona hun chawlhkar khat vel chauh an nei hman a; tarlan fo tawh ang khan, club thenkhatin India team-a tel tura koh an player-te an chhuah lawk duh lo a, Sunil Chhetri pawhin Singapore an pan hma lawkin team a zawm ve chauh kha a ni a, kha’ngte vang pawh kha a ni mai thei a, an mikhualna mualah an talbuai viau!
Chawlhlawk hma chiahin goal an chhuah a; an buaina belhchhah turin second half tan hnu lawk minute 47-ah an defender rinrawl Sandesh Jhingan chu yellow card vawi hnih hmuh vanga hnawhchhuah a han ni lehzel a, an mikhualna hmun atangin India kha point hlawhchhuak tura beisei an ni lo.
Jhingan kha thla hmasa CAFA Nations Cup khelh laia a biangki ru auh an zai avangin kar liamta game-ah khan hmaikawr (face mask) vuah chungin an inkhel a, chute khawpa Blue Tigers tana a hlu chung chuan hnawhchhuah tawkah a han tang zui leh ta hlauh a ni!
A tam zawk ni chung leh mikhual tlarhnung innghahna lian hmachhawn tur nei lo chunga second half pumpui deuh thaw an khel chungin home team lamin goal an khung belh zo lo ni satliah mai loin last minute-ah an hmahruaina an la hloh zui leh ta zel a; chak mamawh ngawig ngawih chunga point thum hawn lo lo India tan pawh kum 2027-a tournament tak tak khel thei turin kawng a hautak zual leh sauh ve tho bawk!
Group tina a sang ber theuh hi 2027 AFC Asian Cup khel turin an tling dawn a; tunah hian group tina team pali theuhte chuan home and away format-in an khel mek a, match ruk theuh an khelh zawha a sang ber zel an tling ang.