Vawiinah Indian Super League hmalam hun ngaihtuah dawn!
Vawiinah Indian Super League hmalam hun ngaihtuah dawn!
All India Football Federation (AIFF) chuan Indian football league inkhaidiat dana a sang ber ni chho ta Indian Super Leaghue (ISL) chu 2025-26 calendar-ah telh tawh lo mah se vawiin hian ISL hmalam hun ngaihtuah turin AIFF leh ISL club pariat CEO theuhte New Delhi-ah an inhmukhawm dawn tih Indian football thuneitu sang ber hian thuchhuah siamin X lamah an tarlang.
Tarlan fo tawh angin, Indian Super League hmalam hun a chiang lo a, season thar hi an tan leh thei dawn em tih pawh a chian loh hnuah Mizo player pahnih khelhna Bengaluru FC phei chuan an player leh staff-te hlawh an pek rih loh tur thu an puang a, mangang ru taka ISL nena inzawm mihringte leh Indian football fans an awm laiin vawiin hian thu pawimawh tak ngaihtuahho turin Delhi-ah Indian football-a mi pawimawh rualte an inhmukhawm dawn a, eng chiah nge an rel chhuah dawn tih hriat chakin mi tam takin he meeting hi an ngaichang dawn a ni.
ISL buaina bulpui ber chu AIFF leh sumdawnna lama an thawhpui FSDL-te inkara contract ziah thar a ni thei ta rih lo hi a ni a; ISL kalphung, hawiher, sumdawnna lama a dinhmun zawng zawng hriltu Master Rights Agreement (MRA) an tih chu chinfel a la nih loh avangin he top-tier league hi a tawp rih dawn nge season thar a chuangkai dawn tih sawi theih a ni rih lo.
ISL club hrang hrangin season tan leh ngei duhin an buaina chinfelsak thuai turin AIFF hnenah ziakin an thlen hlawm a, organiser Football Sports Development Limited lamin national federation nena MRA an la chinfel theih loh avangin Indian club football inelna sang ber chu a ding rih mek a ni.
MRA ziak AIFF leh sumdawnna lama an thawhpui FSDL-te kum 15 chhung zet thawhdun tawhna chu kumin December ni 18 hian a tawp tawh dawn a, tun thlenga inremna thar an la puitlin theih loh avangin buaina hi a rawn irhchhuak ta a ni.
Vawiina AIFF nena inbe tur club-te hi Bengaluru FC, Jamshedpur FC, FC Goa, Hyderabad FC, Kerala Blasters, NorthEast United FC, Odisha FC leh Punjab FC-te niin, Kolkata khaw club pathum – Mohun Bagan Super Giant, East Bengal leh Mohammedan Sporting bakah Mumbai City FC leh Chennaiyin FC-te chu he sawihonaah hian an tel dawn lo.
Thla hmasa mai khan AIFF President Kalyan Chaubey chuan competition tan hun tur chu sawi lawk fak theih ni rih lo mah se ISL season thar chu tan a nih ngei tur thu a lo tiam tawh a, a sawi dan chuan, “He league hi a kal leh lo a nih chuan footballer-te mai ni loin football nena inkaihhnawih mi tam tak a nghawng dawn a, chuvangin, league chhunzawm a nih leh theihna’n theihtawp kan chhuah dawn a ni,” a ti.
Thla hmasa mai, July ni 11 khan ISL organiser FSDL chuan kum 2010 daih tawha AIFF nena thuthlung an lo ziah tawh MRA ‘renew’ theih a nih rih loh avangin ISL 2025-26 season chu ngaihtuah theih a nih rih loh thu an puang a ni.
He buaina hi awm lo ni se la chuan season thar ISL hi kumin September thla atanga nakkum April thla chhunga khelh tur a ni.
Indian football buainaah hian Supreme Court pawh a inrawlh tawh a, AIFF draft constitution case chinfel a nih hma chuan AIFF chu FSDL nena MRA ziah thar chungchang kalpui lo turin a lo hriattir tawh a, hei hi ISL buaina bulpui a ni mah zawk awm e.
Supreme Court hian football kaihhnawih ‘case’ a buaipui mek hi a puang hnai tawh tura ngaih a ni.