Vawk hrilengin a vanglai thleng mek

Vawk hri African Swine Fever (ASF) a leng mek a, AH&Vety department lam chuan he hrileng hian a vanglai a thleng mekah an ngai. A vanglai a thleng mek a, a tlakhniam thuai a rinawm, an ti.
ASF vang hian vawk a thi nasa a, hri vanga thi bakah hri vanga tihhlum/suat (cull) pawh a tam. He hri hi tihdam theih loh a nih avangin vawkin a vei chuan a darh zual loh nan tihhlum a ni thin.
Tun hnaiah vawk thi zat leh tihhlum zat hi a pung a, ni tinin a sang thei hle. AH&Vety department-in an chhinchhiah danin, July ni 15-ah khan vawk 100 a thi a, vawk 288 tihhlum/suat a ni. July ni 14-ah vawk 32 a thi a, vawk 113 tihhlum a ni. July ni 13-ah phei chuan vawk thi zat hi 181 a tling a, vawk 126 tihhlum a ni bawk.July ni 12-ah pawh vawk 129 a thi a, vawk 299 tihhlum a ni.
Vawk thi zat leh suat zat a tam a, AH&vety department lam chuan kum dangah pawh July vel hi ASF hrilen vanglai a ni thin tih an sawi.
ASF hi June leh July velah a vanglai a thleng thin an ti a, August velah chuan a zia a beiseiawm thu an sawi. Chutih rual chuan nikumah khan September-ah a la sang tho mai tih an sawi a, sawi lawk a har thu an sawi tel.
Kumin hian ASF vanga vawk thi hmasa ber chu February ni 9-a mi a ni a, April vel atang khan hri hi a hluar a ni.