Vawksa hlauhawm loh, vawk dam lo sa erawh ei loh tur

Vawk natna African Swine Fever (ASF) hri a len avangin tunlaiin mipuiin vawksa an thinhrik a, vawksa ei ngam lo an tam avangin vawk vulhtute leh a sattute’n harsatna an tawk mek. Hetih lai hian mithiamte chuan vawksa hrim hrim ei a hlauhawm loh a, vawk dam lo sa erawh ei loh tur an ti.
AH&Vety department hotute chuan vawksa thinhrik ngawt tur a nih loh thu an sawi a, mahse vawk dam lo sa erawh ei loh tur a nih thu, ASF emaw natna dang emaw pawh ni se vawk dam lo sa chu ei loh tur a nih thu an sawi.
Vawkin ASF hi vei se, chu vawk sa chu mihringin ei ta se, ASF hrim hrim hian mihringah natna a thlen lo an ti.
Amaherawhchu, ASF vei vawk hi miin talh se, natna dangin lo tlakbuak ta se a pawi thei tih an sawi a, mihringah natna do theihna (immunity) a tihniam thei tih ngaihdan a awm tih an sawi bawk.
ASF vei vawk hi talh loh tur a nihna chhan pawimawh chu, a hri darh loh nan a nih thu an sawi a, chuvangin ASF vei vawk talh lo tur te, a sa lei lo turtein mipui an beisei tih an sawi.
ASF hi kuminah April aTang khan a hluar a, a mar rih khawp mai.
AH&Vety department-in an chhinchhiah danin, May ni 24 thleng khan Mizoramah ASF vangin vawk 1024 a thi tawh. May ni 23 thlenga thi zat kha 961 a ni a, ni khatah vawk 63 a thih belh. Vawk 63 a thih bakah ASF vang bawkin ni khat lekah vawk 197 tihhlum/suat a ni bawk.
ASF hrileng hi nikum lama leng tawh kha a ni a, nikum kum laihawl vela mi kha a la reh lo. Kumin hian April vel aTang khan a hluar nia ngaih a ni.