VC-ah ruling leh eptu danglam lo – Zodintluanga

VC-ah ruling leh eptu danglam lo
– Zodintluanga
Village council leh local council-ah ruling leh opposition nihin danglamna a nei loa, tuna chief minister ni mekin a lo sawi tawh angin an chanpual turah danglamna a awm loa, mipuiin ruling kher thlang loin mitha thlang mai turin a ngen tih Congress hruaitu Zodintluanga chuan a sawi.
AlACC national executive member Zodintluanga hian Dampa constituency-a Silsury khuaa village council inthlan atana a campaign-naah thu sawiin, village council leh local council chanpual tur hi sawrkar atanga fel taka ruahman a ni a, ruling party leh opposition VC chanpual tur a danglam loa, chief minister Pu Lalduhoma ngei pawhin he thu hi a sawi tih a sawi a ni.
ZPM sawrkar chu Mizoram mipuiin beiseina sang tak nen an thlir a, beiseina pawh mipui an pe reng bawk a; mah se, mipuiin an beisei an hmu lo tan nghal der a, kalphung thar nia an sawi chu kalphung fuh lo tak a ni tih a takin mipuiin an hmu mek tih a sawi. ZPM sawrkar chu mite sawi angin ruihhlo ngai, an mamawh leina tura an neih ang ang hralh duh zel, mahni chenpui chhungte thil pawh hralh a, dahkham mai duh ang an ni, tiin, “Congress sawrkar laia Pu Lal Thanhawla hoa harsa taka kan sualchhuah kan airport neihchhun pawh Indian Air Force hnena hlan mai an tum mek a, an chief minister ho hian engkim mai hi sumdawnna emaw tiin mipui mamawh sawrkar hmasaten an lo din tawh pawh a theh dere zawngin an che zel mai a ni,” a ti.
Nuamsaa an sawrkar theihna tur a nih chuan mipuiin tuar dawn mah se, pawisak an nei lo niin Zodintluanga hian a sawi a. “Engkim mai hi sumdawnna mitin ZPM chuan an thlir tlat a, kan kawngpui pawh hi sum senthlawnna, sawrkarin sum kan hloh an la ti loang tih pawh a sawi theih loh. Mipui mamawhna lam aiin an sawrkar hian a hlawkna a hmu em tih zelin tehfung an hmang,” a ti.
Mizoram pumah Congress party-in nasa takin hma a sawn niin Congress hruaitu hian a sawi a. Sawrkar laipui lamah pawh Congress party thawm a lian zel a, India ram politics mil zela Mizoram mipuiin ke pen ve a ngai tih a sawi a ni.